O Club Natación Ordes suma novas medallas no Trofeo Codesal e no Galego Máster
O Club Natación Ordes pechou unha fin de semana intensa e chea de bos resultados en dúas citas deportivas celebradas na Guarda e en Santiago de Compostela. A entidade desprazou os seus nadadores máis novos ao Trofeo Codesal, mentres que os deportistas máster competiron no Campionato Galego da categoría.
Na Guarda, os máis pequenos do club demostraron o bo traballo realizado ao longo da tempada. Nadia conseguiu medalla nos 50 metros braza, Xian subiu ao podio cun bronce nos 100 metros bolboreta, Abel F. foi terceiro nos 100 metros braza e Lía tamén acadou o bronce nos 100 metros braza.
A representación ordense tamén tivo unha destacada actuación en Santiago, onde se disputou o Campionato Galego Máster. Ana logrou medalla nos 200 metros braza e bronce nos 50 metros braza. Rebeca conseguiu a prata nos 50 metros bolboreta e o bronce nos 50 metros braza, mentres que Tania sumou unha prata nos 100 metros libre e un bronce nos 50 metros libre.
Desde o club celebran estes resultados como unha recompensa ao esforzo dos nadadores e nadadoras nun treito final de tempada marcado polo traballo constante. A entidade continúa así consolidando a súa presenza nas competicións galegas, tanto nas categorías de base como no ámbito máster.