A música en galego e as culturas atlánticas toman a Praza da Tolerancia co festival 'Aquí Tamén se Fala'
A Praza da Tolerancia volverá converterse o venres 12 de xuño nun punto de encontro para a música en galego, a mocidade e as culturas atlánticas coa celebración da terceira edición do festival 'Aquí Tamén se Fala'. A cita comezará ás 17.00 horas e terá entrada gratuíta.
O cartel deste ano reúne á artista portuguesa Carolina Deslandes, unha das voces máis populares da música lusa actual, xunto ás formacións galegas Apolo 18, Kid Mount e De Ninghures. A presenza de Deslandes dálle unha dimensión internacional a un festival que naceu nas aulas do IES Rafael Dieste e que continúa medrando como unha das propostas máis singulares de dinamización lingüística do país.
A presentación da nova edición celebrouse no propio instituto coruñés, coa participación do concelleiro de Cultura e Turismo, Gonzalo Castro, e do secretario xeral da Lingua, Valentín García. Desde as administracións destacaron o papel do alumnado e do profesorado nun proxecto que conseguiu saír do centro educativo para converterse nun movemento social arredor do uso do galego.
'Aquí Tamén se Fala' xurdiu como unha campaña impulsada pola mocidade para visibilizar a presenza da lingua galega nos barrios da Coruña. Co paso do tempo, a iniciativa estendeuse a arredor de 300 centros educativos de Galicia e mobilizou a milleiros de estudantes a través de accións nas aulas, entrevistas, campañas nas redes sociais e actividades culturais.
O festival é hoxe unha das caras máis visibles dese movemento. Nas súas dúas edicións anteriores reuniu arredor de 5.000 persoas en cada convocatoria, consolidándose como unha festa da lingua con protagonismo xuvenil e espírito aberto.
A edición deste ano aposta por unha programación que combina a conexión atlántica con Portugal, representada por Carolina Deslandes, e o momento creativo que vive a música galega. De Ninghures, Kid Mount e Apolo 18 achegarán estilos diferentes a unha xornada pensada para demostrar que o galego pode ocupar con naturalidade os escenarios, as rúas e os espazos de lecer da mocidade.
A iniciativa recibiu nos últimos anos recoñecementos como o Premio da Cultura Galega, o Innovagal, o Rosalía de Castro da Deputación da Coruña ou o Mil Primaveras. Para os seus impulsores, o obxectivo segue a ser o mesmo que no comezo: facer do galego unha lingua visible, útil e presente na vida diaria das novas xeracións.