A mitoloxía e os contos toman o relevo na programación de Culleredo do Día do Libro
Culleredo conmemorará o Día do Libro cunha programación cultural pensada para atraer tanto ao público adulto como ao infantil. O Concello aposta este ano por dúas actividades na Biblioteca Xosé Cardeso Liñares, en Villamelania, co obxectivo de achegar a lectura e a creación cultural á veciñanza a través da música, a divulgación e a narración oral.
A cita central desenvolverase o xoves 23, coincidindo coa celebración do Día do Libro, coa proposta 'A música dos deuses'. Trátase dun concerto-conferencia centrado na mitoloxía clásica como fonte de inspiración artística ao longo do tempo. Durante a sesión repasaranse algúns dos relatos máis coñecidos do mundo antigo, combinando explicacións divulgativas con interpretación musical en directo.
A actividade contará coa participación de Concepción Pazos e da soprano Susana de Lorenzo, que interpretará varias pezas ao vivo mentres se proxectan contidos audiovisuais vinculados a ese universo mitolóxico. O encontro comezará ás 19.00 horas e terá entrada libre ata completar a capacidade do espazo.
A programación continuará o venres 24 cunha proposta pensada para a rapazada. A partir das 17.30 horas, a Dragona Ramona ofrecerá unha sesión de contacontos dirixida a nenos e nenas desde os 3 anos, tamén na biblioteca de Villamelania e con acceso libre.
Con esta iniciativa, Culleredo reforza a súa aposta por celebrar o Día do Libro cun formato aberto e participativo, no que a literatura convive coa música e coa tradición oral para chegar a públicos de diferentes idades.