A mirada fotográfica dos máis pequenos de Coirós chega ao Museo das Mariñas coa exposición 'Expo Coirós'
O Museo das Mariñas acolle desde hoxe, 30 de outubro, Expo Coirós, unha exposición fotográfica que recolle a particular visión do municipio a través dos ollos dos nenos e nenas da Escola de Educación Infantil de Coirós. A iniciativa reúne os traballos realizados polo alumnado de 3, 4 e 5 anos, que se converteu en protagonista dun proxecto artístico e educativo arredor da fotografía.
A proposta permitiu que os pequenos fotógrafos levasen as cámaras ás súas casas para retratar o seu contorno máis próximo, os lugares que forman parte da súa vida cotiá e diferentes paisaxes do concello. Coa colaboración do fotógrafo artístico Manolo Bouzón, a cativada explorou a fotografía desde a súa propia espontaneidade e creatividade, ofrecendo unha perspectiva diferente da realidade de Coirós.
O proxecto incluíu tamén unha parte formativa no propio Museo das Mariñas. O alumnado participou en obradoiros fotográficos impartidos pola especialista Ana Tomé, nos que contou co acompañamento do equipo do centro e de persoal en prácticas. Deste xeito, Expo Coirós non só reúne as imaxes realizadas polos nenos e nenas, senón que tamén permite coñecer o proceso de aprendizaxe e creación que hai detrás delas.
A exposición poderá visitarse no Museo das Mariñas de luns a venres, en horario de 9.00 a 14.00 e de 16.00 a 20.00 horas. A mostra propón así un achegamento ao territorio desde unha mirada infantil, na que escenas habituais e espazos coñecidos adquiren un novo significado a través da fotografía.