A maior estación de recarga de Galicia inaugúrase en Culleredo para liderar a transición cara á mobilidade limpa
Galicia conta desde este mércores coa maior rede de recarga ultrarrápida para vehículos eléctricos da comunidade, tras a inauguración da nova estación de Atlante na área de servizo do Burgo, en Culleredo. A instalación dispón de 16 puntos de recarga ultrarrápida, aos que se sumarán outros 16 na área de servizo de San Simón (Pontevedra), que comezarán a funcionar a próxima semana, acadando un total de 32 puntos na AP-9.
O acto de inauguración estivo presidido polo ministro de Industria e Turismo, Jordi Hereu, acompañado polo delegado do Goberno en Galicia, Pedro Blanco; o subdelegado do Goberno na Coruña, Julio Abalde; o conselleiro de Presidencia, Xustiza e Deportes, Diego Calvo, e responsables de Atlante. O conselleiro delegado da compañía en España, Quim Ibern, destacou que se trata da "maior estación de recarga de Galicia", mentres que o ministro defendeu que "a mobilidade eléctrica xa é unha realidade" e subliñou o crecemento deste tipo de vehículos no mercado español.
As dúas estacións sitúanse en puntos estratéxicos da Autoestrada do Atlántico, pola que circulan diariamente preto de 50.000 vehículos, co obxectivo de reforzar a infraestrutura de recarga nun dos principais corredores viarios do noroeste peninsular e facilitar os desprazamentos das persoas usuarias de vehículos eléctricos.
O proxecto forma parte da estratexia de electrificación da AP-9 e enmárcase no impulso estatal á mobilidade sostible. Segundo lembrou o Ministerio de Industria, España pechou 2025 con máis de 53.000 puntos públicos de recarga, un 37 % máis que o ano anterior, e durante o primeiro semestre de 2026 incorporáronse outros 3.610 novos puntos. Galicia figura, ademais, entre as tres comunidades autónomas con maior crecemento no índice de desenvolvemento da mobilidade eléctrica.