Deputación | Sanidade

A Deputación da Coruña e a Asociación Española Contra o Cancro poñen en marcha a Rede de Concellos Contra o Cancro, unha iniciativa dotada con 211.475 euros para reforzar a prevención, o acompañamento ás persoas pacientes e a acción comunitaria, con especial atención ao medio rural

A provincia da Coruña quere dar un novo paso na loita contra o cancro cunha estratexia conxunta que implique de forma directa aos concellos. A Deputación e a Asociación Española Contra o Cancro presentaron a Rede de Concellos Contra o Cancro, un proxecto pensado para estender a prevención, o apoio e os recursos a todo o territorio provincial, sen que o lugar de residencia marque diferenzas na atención.

A iniciativa foi dada a coñecer nun acto celebrado no Espazo Avenida Abanca, coa participación do presidente da Deputación, Valentín González Formoso, e do presidente da Xunta Provincial da Asociación Española Contra o Cancro na Coruña, Javier Álvarez Barbeito, ademais de representantes institucionais, voluntariado e alcaldes e alcaldesas de distintos municipios coruñeses.

Durante a presentación, Formoso puxo o foco no papel dos concellos como administración máis próxima á cidadanía e defendeu a necesidade de artellar unha resposta coordinada diante dunha enfermidade que segue a ser un dos grandes desafíos de saúde pública. O presidente provincial resumiu o obxectivo da rede ao sinalar que se busca 'garantir que todas as persoas teñan acceso a apoio, información e recursos, independentemente do lugar onde vivan'.

A nova estrutura nace nun contexto de forte impacto da enfermidade na provincia. Segundo os datos expostos durante o acto, no último ano rexistráronse 7.959 novos casos e máis de 16.000 persoas conviven actualmente co cancro na provincia da Coruña. Unha realidade que, segundo destacaron os impulsores da rede, non só ten consecuencias sanitarias, senón tamén sociais, emocionais e económicas para as familias.

A Rede de Concellos Contra o Cancro artellarase arredor de tres grandes liñas de traballo. A primeira centrarase na prevención e na promoción de hábitos de vida saudables. A segunda buscará reforzar o acompañamento ás persoas enfermas e ás súas familias. E a terceira apostará pola mobilización da comunidade e do voluntariado como ferramenta de apoio e sensibilización.

O proxecto pretende, ademais, mellorar a coordinación entre os concellos, os servizos sociais, a atención primaria e a propia asociación, de maneira que se consolide unha estrutura estable de cooperación en toda a provincia. Esa rede apoiará accións como a creación de espazos libres de fume, campañas de sensibilización, programas comunitarios como os Clubs de Saúde e a extensión de recursos gratuítos para pacientes e familias.

A base sobre a que se constrúe esta iniciativa é a experiencia acumulada pola Asociación Española Contra o Cancro na provincia, onde conta con 32 profesionais, 775 persoas voluntarias e presenza en 45 concellos. Cada ano atende a máis de 2.500 persoas a través de servizos gratuítos de apoio psicolóxico, social e rehabilitador.

No acto, Javier Álvarez Barbeito destacou que a rede supón 'un novo paso no camiño que temos que recorrer para que as oportunidades dos pacientes sexan as mesmas, independentemente de onde residan', e subliñou que a implicación da Deputación e dos concellos será clave para consolidar o proxecto.

A posta en marcha da rede contará cun orzamento global de 211.475 euros, dos que a Deputación achegará o 75 % a través dun convenio coa asociación. O financiamento permitirá reforzar o equipo técnico, despregar actuacións de prevención e apoio, medir o impacto das accións e consolidar unha estrutura coordinada entre institucións e tecido social.