Infraestructuras

O Concello está a rematar a actuación de mellora da calzada ao longo desta rúa, con repintados e un reordenamento do aparcadoiro para aumentar a capacidade

O Concello da Coruña rematará nos próximos días a intervención de reasfaltado e acondicionamento na rúa Médico Devesa Núñez, que mellorará substancialmente o estado das calzadas e inclúe tamén actuacións de repintado e outros axustes puntuais para distribuír máis eficientemente os espazos da contorna.

Outra das novidades que traerá esta actuación é un reordenamento nas zonas de estacionamento que aumentará o número de vehículos que poderán aparcar nesta rúa, dando así resposta a unha demanda veciñal, especialmente dos residentes dos edificios de vivendas presentes na contorna. Así, levando a cabo unha racionalización das áreas habilitadas para estacionar, se gañarán tamén novos espazos. Tamén se procedeu a eliminar algúns elementos que puidesen supoñer un obstáculo para os vehículos da zona.

A obra está a levarse a cabo nestes días por tramos para permitir en todo momento o acceso aos residentes da rúa. "O reacondicionamento desta rúa é fundamental porque acolle tanto áreas residenciais como un centro de formación da Cruz Roja, a comandancia da Guardia Civil e a comisaría da Policía Nacional polo que era necesario acometer unha mellora das condicións xerais satisfacendo, ademais, as necesidades de estacionamento", apuntou o concelleiro de Infraestruturas, Jesús Celemín.