A II Mostra de Teatro no Mosteiro levará tres espectáculos ao claustro de San Salvador de Bergondo
O claustro do Mosteiro de San Salvador de Bergondo volverá transformarse nun escenario teatral do 3 ao 5 de setembro con motivo da segunda edición da Mostra de Teatro no Mosteiro. A iniciativa busca consolidar este espazo patrimonial como un lugar para as artes escénicas e ofrecer ao público unha programación cultural nun contorno singular.
A mostra contará con tres espectáculos, un por cada xornada, e manterá o carácter gratuíto da primeira edición, celebrada en setembro de 2025. As actuacións comezarán ás 21.00 horas e o acceso será libre ata completar o aforo habilitado de 150 persoas.
A programación arrancará o xoves 3 de setembro con Muiñada, da compañía Galeatro, unha proposta dirixida especialmente ao público familiar. O venres 4 chegará a quenda do teatro afeccionado con Encrobas, representada polo grupo de teatro da Asociación Catro Gatos.
A segunda edición pecharase o sábado 5 de setembro con Absurdia, de Dani Blanco Cía, unha montaxe dirixida ao público adulto que poñerá o punto final a tres xornadas de teatro no histórico claustro bergondés.
Máis aló da propia programación, a mostra formula como un dos seus principais obxectivos achegar as artes escénicas a espazos patrimoniais e xerar novas formas de gozar da cultura. O claustro do mosteiro convértese así nunha parte esencial da experiencia, integrando os espectáculos nun contorno arquitectónico de especial valor.
O Mosteiro de San Salvador é un dos referentes do patrimonio románico das Mariñas. Aínda que non existe certeza sobre o ano exacto da súa fundación, hai referencias documentais que sitúan a súa existencia, como mínimo, no século XII. O conxunto foi declarado Monumento Histórico-Artístico en 1973, antecedente da súa actual consideración como Ben de Interese Cultural.
A iniciativa está organizada pola Asociación Cultural Catro Gatos e o Concello de Bergondo, co apoio da Deputación da Coruña, e dá continuidade a unha primeira edición que serviu para poñer en relación o patrimonio do municipio coas artes escénicas.
Durante tres noites, o claustro de San Salvador volverá ser, polo tanto, o punto de encontro entre teatro e patrimonio, cunha programación que busca atraer a públicos de diferentes idades e achegar as artes escénicas a un escenario pouco habitual.