A fronte da Intermodal perderá dous carrís coa reforma da avenida do Ferrocarril
A contorna da futura estación Intermodal da Coruña encara unha nova fase de transformación urbana coa remodelación da avenida do Ferrocarril, unha actuación que levará consigo a perda de dous carrís na rolda de Outeiro diante da estación. O Goberno local aprobou a saída a licitación deste proxecto, orzado en case 1,5 millóns de euros e cun prazo de execución de 10 meses, co obxectivo de adaptar a zona aos novos fluxos de tráfico e á integración dos accesos ferroviarios e interurbanos.
A actuación afectará ao tramo comprendido entre a rolda de Outeiro e a rúa Xeneral Rubín e prevé unha modificación da sección transversal da avenida, así como a reorganización do enlace coa propia rolda de Outeiro para mellorar a seguridade viaria e a fluidez do tráfico. O proxecto inclúe tamén a creación dunha nova glorieta na intersección con Xeneral Rubín, que facilitará os cambios de sentido e a saída de vehículos desde o aparcadoiro subterráneo da estación.
A reordenación do espazo completarase coa habilitación dunha dársena para autobuses interurbanos no acceso desde Alfonso Molina e coa prolongación do carril bici, que enlazará a rolda de Outeiro coa avenida da Sardiñeira e coa propia Intermodal. O Concello enmarca esta intervención na adaptación do barrio á nova realidade de mobilidade que traerá a estación, chamada a converterse nun dos principais nós de transporte da cidade.