A FP téxtil da Coruña aspira a ser referencia nacional desde Paseo das Pontes
A Xunta traballa para que o Centro Integrado de FP Paseo das Pontes da Coruña sexa recoñecido como Centro Nacional de Referencia na familia profesional de Téxtil, Confección e Pel, unha distinción que aínda non ten ningún centro en España neste ámbito.
A directora xeral de Formación Profesional, Eugenia Pérez, visitou este venres o centro xunto coa secretaria xeral de FP do Ministerio, Esther Monterrubio, e representantes de Inditex, co obxectivo de amosar as potencialidades das instalacións e avanzar nos trámites da candidatura.
O recoñecemento permitiría ao centro acceder a financiamento específico do Ministerio para desenvolver plans de traballo vinculados á innovación, á formación especializada e á colaboración co tecido produtivo. A Xunta destaca neste sentido a relación do Paseo das Pontes co sector da moda e coa firma Inditex.
A rede estatal de Centros de Referencia Nacional está formada por 40 centros públicos especializados en diferentes sectores produtivos. Galicia conta actualmente con dous, ambos no ámbito marítimo-pesqueiro.
A partir desta visita, a Consellería de Educación comezará a preparar a documentación da candidatura para elevala ao Ministerio.