A festa urbana e verbeneira prende mañá co debut do Fina Fest
Miño conta as horas para estrear unha nova cita musical. O Fina Fest celebrarase mañá, venres 22 de maio, cunha primeira edición pensada para mesturar ambiente de verbena, sesións urbanas e unha noite de baile ata a madrugada. O festival arrancará ás 20.00 horas e prolongarase ata as 4.00 horas do sábado.
O nome máis agardado do cartel será Kiko Rivera, que chega como cabeza de cartel e principal reclamo dunha programación orientada ao público que busca música festiva, ritmos comerciais e unha proposta nocturna sen pausas. A súa actuación está prevista para as 23.30 horas, no tramo central dunha noite que irá medrando desde primeira hora.
A programación abrirase con Planas ás 20.00 horas e continuará con Unaiii ás 21.00 horas e David Expósito ás 22.00 horas. Tras o paso de Kiko Rivera polo escenario, a festa seguirá con Sebas 21 ás 00.30 horas, Adrián Gold ás 02.00 horas e unha nova sesión de Unaiii ás 03.30 horas.
O festival nace coa intención de converterse nunha proposta diferente dentro do calendario musical da comarca, cun formato que combina espírito de verbena, música urbana e sesións de DJ. A organización corre a cargo de Indomable Fests e as entradas están dispoñibles desde 12 euros máis gastos de xestión. O acceso está prohibido para menores de 16 anos.
Con esta estrea, Miño suma unha nova noite de música ao seu calendario de primavera e reforza o tirón dos festivais de proximidade, nunha cita que aspira a atraer público da comarca e tamén da área coruñesa.