A Festa da Xente Nova volve con música, gastronomía e verbena en Cambre
A Festa da Xente Nova regresa esta fin de semana a Cambre cunha programación pensada para reunir veciñanza, música, gastronomía e actividades para todas as idades. A décimo cuarta edición desenvolverase do venres 5 ao domingo 7 de xuño, organizada pola S.D.C.R. Sporting Cambre co apoio do Concello.
A celebración arrincará o venres ás 20.30 horas co X Encontro de Grupos Tradicionais Sementeira. A primeira noite contará tamén cunha cea popular na que haberá fideuá.
O sábado será a xornada central da festa. A programación comezará ás 10.00 horas coa alborada e o tradicional pasabares. Ás 14.30 horas celebrarase a sesión vermú con Aixa Romay e, xa pola tarde, ás 17.30 horas, haberá inchables gratuítos no parque da Igrexa.
A música coral tamén terá o seu espazo ás 19.30 horas, cun concerto de corais no anfiteatro. En caso de choiva, a organización habilitará carpa. A partir das 20.30 horas celebrarase unha gran churrascada e, ás 22.30 horas, chegará a verbena coa actuación de Fania Blanco Show e Disco Móbil Impacto. Durante o descanso da verbena sortearanse 500 euros.
O domingo 7 de xuño a festa continuará cunha nova sesión vermú a cargo de Aixa Romay, ás 14.30 horas, e cun tardeo con DJ Isaac desde as 16.30 horas. A xornada incluirá tamén paella para xantar.
A Festa da Xente Nova consolídase así como unha das citas populares do calendario local, cun programa que combina tradición, convivencia e ambiente festivo durante tres días.