A Feira de Prácticas e Emprego da FIC abre hoxe as portas na UDC
A Facultade de Informática da Universidade da Coruña acolle desde hoxe a VII Feira de Prácticas e Emprego da FIC, unha cita que converterá ata o venres este centro universitario nun punto de encontro entre o alumnado de grao e máster e o ecosistema tecnolóxico galego e estatal.
A feira, organizada pola FIC en colaboración coa Fundación Universidade da Coruña e o Centro de Investigación en Tecnoloxías da Información e as Comunicacións, busca tender pontes entre o talento universitario e as principais compañías do sector TIC. Nesta edición participan 32 empresas, que ao longo de tres xornadas presentarán oportunidades de emprego, prácticas e perfís profesionais ao estudantado.
A programación deste primeiro día arrinca ás 9.30 horas coa apertura institucional no salón de actos, a cargo da vicerreitora de Estudantes e Empregabilidade, María José Lombardía, e do decano da facultade, Mariano Cabrero. A continuación, ás 9.35 horas, celebrarase unha breve presentación das empresas participantes na xornada. Tras a pausa café das 10.30 horas, a actividade trasladarase aos stands desde as 10.45 horas, cun espazo de networking pensado para facilitar o contacto directo entre estudantes e empregadores. O peche desta primeira sesión está previsto para as 14.30 horas.
Neste arranque da feira estarán presentes Abanca, Accenture, Altia, Avansig, Bahía Software, Balidea, CINFO, Deloitte, Denodo, FUAC e ITG. A proposta permitirá ao alumnado coñecer de primeira man as demandas actuais do mercado laboral e achegarse a empresas destacadas do ámbito tecnolóxico.
A cita completarase nas próximas dúas xornadas con novas firmas participantes e coa entrega, o venres, do XI premio ao mellor TFG aplicado da FIC. A vicedecana de Relacións Institucionais da facultade, Elena Hernández, destaca que esta feira se consolida ano tras ano como un espazo esencial para abrir portas profesionais e reforzar o compromiso da FIC coa innovación, o emprego e o ensino público de calidade.