Sociedade

A feira de artesanía MOSTRART celebra a súa 40ª edición recuperando o programa ‘Oficios ao Sol’, unha serie de obradoiros artesanais abertos á participación cidadá que teñen como obxectivo dar a coñecer os oficios tradicionais de Galicia.

A feira de artesanía MOSTRART celebra a súa 40ª edición recuperando o programa ‘Oficios ao Sol’, unha serie de obradoiros artesanais abertos á participación cidadá que teñen como obxectivo dar a coñecer os oficios tradicionais de Galicia. Esta actividade está organizada pola Asociación Galega de Artesáns en colaboración co Concello da Coruña, seguindo a liña do Goberno de Inés Rey para o apoio ao arte e cultura tradicionais de Galicia.

MOSTRART abrirá as súas portas este sábado 27 de xullo nos Xardíns de Méndez Núñez, con numerosas actividades paralelas entre as que destaca ‘Oficios ao Sol’. Os obradoiros celebraranse todos os luns e martes durante a celebración da feira, en horario de 11.00 a 14.00 horas e de 18.00 a 21.00 horas. A participación é gratuíta, previa inscrición no stand de información da feira, e están orientados a todas as idades. Os menores deberán estar acompañados e supervisados por unha persoa adulta. En total impartiranse oito obradoiros de diferente tipo, dende o 29 de xullo ao 19 de agosto. A programación completa por día é a seguinte:

• Luns, 29 de xullo | Obradoiro de coiro, impartido pola artesá Ana Novo do taller Tres Caracoles. Trátase de aprender a elaboración de diferentes tipos de follas en pel que cada persoa participante escollerá en que prefire transformala; chaveiro, broche, imán ou pendentes, aplicando diferentes técnicas da marroquinaría. Está previsto para un máximo de 6 participantes en quendas dunha hora e media e a idade recomendada é a partir dos 12 anos.
• Martes, 30 de xullo | Obradoiro de pregado de papel, da artesá Miriam Otero de Mioco Deseños. No obradoiro de pregado de libros, as persoas poderán facer unha figura con forma de corazón a través dunha plantilla creada pola artesá. A participación é a partir de 14 anos en quendas de tres horas, unha pola mañá e outra pola tarde, cun máximo de catro persoas por quenda.
• Luns, 5 de agosto | Obradoiro de ourivería, coa artesá Carla Alfaia. Obradoiro colaborativo onde os participantes farán o seu propio colgante coa técnica tradicional da filigrana galega. Rematará coa demostración do soldado das diferentes pezas feitas polas persoas participantes. As quendas serán dunha hora e media cun máximo de 4 participantes e está orientado a maiores de 18 anos.
• Martes, 6 de agosto | Obradoiro de Xoguetes co artesán Guillermo Rocha de Artesanía Silvent. Obradoiro onde os participantes poderán rematar un xoguete de madeira. Está pensado para o público infantil, a partir de 5 anos, en quendas dunha hora cun máximo de 4 participantes.
• Luns, 12 de agosto | Obradoiro de bixutaría, a cargo de Eugenia Domínguez de Artesanía Nia. O obradoiro consistirá na elaboración dunha pequena peza, coa técnica Miyuki de engastado de delicas de cores, para un máximo de 5 persoas en quendas de tres horas, unha pola mañá e outra pola tarde. A idade recomendada para participar neste obradoiro é a partir dos 10 anos.
• Martes, 13 de agosto | Obradoiro de cerámica e modelado, a cargo do artesán Víctor Ares. Elaboración de pezas con técnica de churros ou copiando unha peza de mostra, para a reprodución de partes do corpo, nariz, boca, ollos, orellas… coa técnica do modelado. A participación é a partir de 6 anos en quendas de tres horas, pola mañá ou pola tarde, cun máximo de 6 persoas por quenda.
• Luns, 19 de agosto | Obradoiro de elaboración de papel con Pilar Rodríguez, Papeles para Sentir. Elaboración de follas de papel onde todo o público asistente poderá participar no proceso de transformación a partir dunha pulpa obtida dunha peza téxtil converténdose en papel. Este obradoiro é a partir de 5 anos en quendas que duran de 30 minutos a unha hora cun máximo de 6 participantes.
• Martes, 20 de agosto | Obradoiro de cerería a cargo de Pecoreados Artesanía. Elaboración dunha vela mediante as técnicas de cerería artesanal. Este obradoiro está orientado a rapaces e rapazas de entre 5 e 15 anos en quendas dunha hora e media e cun máximo de 6 participantes.

A feira MOSTRART ofrece unha oportunidade única para coñecer e participar nos oficios tradicionais de Galicia, proporcionando unha experiencia enriquecedora para todas as idades.