A feira de Alfaroleiros dá paso á fin de semana co humor musical de Monoulious DOP
A Feira de Alfaroleiros continúa esta fin de semana con actividades que animarán o centro de Santa Cruz. Ademais da exposición e venda de pezas de olería no Parque Luis Seoane, o sábado contará cun variado programa que inclúe humor musical e cociña en vivo.
Desde as 18.30 horas, os asistentes poderán participar no Obradoiro “A olería nas túas mans”, onde terán a oportunidade de experimentar co traballo da cerámica. Ás 20.00 horas, as persoas maiores prepararán tapas en directo, e a noite pecharase ás 22.00 horas co concerto de Monoulious DOP, que promete unha sesión de música desternillante.
A feira, que comezou o mércores, reúne a 26 artistas de distintos obradoiros de olería da península. Artistas procedentes de Castela e León, A Mancha, Andalucía, Galicia, Estremadura, Valencia, Madrid e Portugal, entre outros, exhiben e venden as súas pezas na herba do Parque Luis Seoane ata o domingo.
Ademais das actividades en curso, pódese visitar unha exposición conmemorativa dos 30 anos da feira. Esta mostra conta con 47 paneis divulgativos distribuídos entre a Praza de Esther Pita, o camiño ao Repicho, a praza do Castelo e outros puntos do paseo marítimo.
Para o domingo, o programa inclúe pasarrúas a cargo do grupo de gaitas Santaia e xogos tradicionais para nenos e nenas no Parque Luis Seoane. A xornada rematará cunha demostración de olería a partir das 13.00 horas.