A falta de espazo nos pavillóns deportivos chega ao pleno de Betanzos
A falta de espazo nos pavillóns deportivos de Betanzos será debatida no pleno municipal a través dunha iniciativa presentada polo BNG, que propón mellorar a planificación das instalacións e optimizar os horarios dispoñibles para facilitar a actividade dos clubs e entidades deportivas.
A concelleira nacionalista Vanessa Rey advirte de que o aumento do número de clubs e a aparición de novas disciplinas fixeron que os espazos actuais resulten insuficientes. Segundo explica, tanto o pavillón municipal como os pavillóns dos centros educativos deben compatibilizar o uso deportivo coa actividade docente, o que reduce a dispoñibilidade para novas actividades.
A formación lembra que o club de bádminton xa tivo que trasladarse a outro concello por non contar cun espazo axeitado para adestrar en Betanzos. Ademais, sinala que os horarios das instalacións existentes están completos, o que dificulta a incorporación de novas asociacións deportivas.
Entre as propostas, figura estudar a incorporación do polideportivo de Guiliade á rede de instalacións empregadas polos clubs e entidades deportivas, co obxectivo de ampliar a oferta e repartir mellor os usos.
A iniciativa tamén pide convocar o Consello de Deportes de Betanzos para escoitar as necesidades das entidades e elaborar un cronograma que permita resolver os problemas vinculados ao uso das instalacións deportivas.