A expectación leva ás Torres de Santa Cruz a presentación do novo libro de Martín Pallín
O auditorio das Torres de Santa Cruz acollerá este xoves, 28 de maio, ás 19.00 horas, a presentación do novo libro do prestixioso xurista galego José Antonio Martín Pallín, titulado 'Visto para sentencia. Jueces e ideología en la Justicia española'. O Concello de Oleiros trasladou o acto a este espazo ante a elevada expectación xerada pola presenza do autor.
A presentación estará conducida pola xornalista Isabel Bravo e contará coa participación do alcalde de Oleiros, Ángel García Seoane. Ambos acompañarán a Martín Pallín nun coloquio no que se abordarán algúns dos principais desafíos actuais do Estado de dereito, a independencia xudicial e as tensións entre a xustiza e a política na España contemporánea.
José Antonio Martín Pallín, nado na Coruña en 1936, conta cunha das traxectorias máis recoñecidas da maxistratura española. Maxistrado emérito da Sala Segunda do Tribunal Supremo e fiscal de carreira, destacou polo seu compromiso coa defensa dos dereitos humanos e polo seu papel como voceiro de Jueces para la Democracia e presidente da Asociación Pro Derechos Humanos de España.
No seu novo traballo, editado por Siglo XXI Editores, o autor propón unha análise crítica sobre o funcionamento interno dos tribunais e a influencia da ideoloxía no sistema xudicial. A obra chega nun momento de intenso debate público arredor da separación de poderes, o papel dos xuíces e a confianza cidadá nas institucións.
O acceso á presentación será libre e gratuíto ata completar aforo.