A Deputación promove durante o mes de xuño o ciclo cultural 'Coa Nosa' Voz no Teatro Colón

ACoruñaXa
Guadi Galego, Antía Muiño, Uxía e Ugía Pedreira actuarán no ciclo os domingos 2, 9, 23 e 30 de xuño
Imaxe da presentaicón de A Cultura é un Dereito da Deputación da Coruña
Imaxe da presentaicón de A Cultura é un Dereito da Deputación da Coruña
20 may 2024

A área de cultura da Deputación promove o ciclo 'Coa Nosa Voz', que se celebrará no Teatro Colón os días 2, 9, 23 e 30 de xuño, e acollerá as actuacións de Guadi Galego, Antía Muiño, Uxía e Ugía Pedreira. As entradas poderán retirarse dende hoxe, de balde, na páxina web de ataquilla.com. Así o anunciou esta mañá a deputada de cultura, Natividade González, acompañada das catro artistas que protagonizan o cartel, “catro voces moi diversas, de diferente procedencia, xeracións, e estéticas, pero todas elas mulleres de referencia no panorama da música galega e nacional”, apuntou.

Os concertos celebraranse durante catro domingos e comezarán o día 2, ás 20.00 horas, co de Guadi Galego, que presentará o seu disco ‘Síntese Horizonte’; continuarán o 9, tamén ás 20.00 horas, co de Uxía e o seu traballo ‘Santa liberdade: un soño compartido’; o día 23, ás 19.00 horas, co de A Pedreira e ‘Basal’, e rematarán o día 30 con Antía Muíño, e o seu último álbum, ‘Carta Aberta’.

Este ciclo nace para poñer en valor a ‘canción de autora’, “conscientes da calidade que hai nestes últimos anos, que non se corresponde coa cantidade de espazos que hai para exhibila” sinalou a deputada. “Queremos visibilizar a canción de autora en galego, celebrar a diversidade, a calidade e o talento de mulleres como elas, que nos enriquecen, nos ensinan e levan a nosa cultura, a nosa lingua e a nosa música por escenarios de todo o mundo”.

Guadi Galego realizará un “espectáculo pensado para teatros pola luz, a escena e a atención”, que requiren “un espazo afectivo e reflexivo”. Ademais, afirmou, “é importante que os teatros se abran á música”, e agradeceu á Deputación este ciclo, “que nos abre espazos como o Colón aos que, moitas veces, é difícil chegar”. E, rematou, “é importantísimo que un país que se sinte vivo, que ten unha lingua viva, compoña dende a actualidade coas necesidades propias da sociedade”.

Pola súa parte, Uxía sumouse ao agradecemento “por facer un ciclo tan acaido con voces de muller ás que quero e admiro” e amosouse “feliz de participar neste programa interxeracional”.

Ugía Pedreira apuntou que se trata dun “ciclo necesario, urxente, xusto e importante” como “creadoras da nosa vida e obra” e que, ademais, “promove o relevo xeracional”. No seu caso, “antes de saltar a fogueira de San Xoan imos facer un aquelarre, con convidados como Guadi Galego, cun espectáculo único, de comunidade e coreografía social”.

E, por último, Antía Muíño dixo sentirse “afortunada” xa que “non se ofrecen tanto espazos como o Colón: un templo da cultura e da arte” e tamén “feliz de compartir cartel con elas, mulleres referentes, e de continuar ese camiño que elas abriron”. ·