A Deputación impulsa o comercio e as tradicións locais cun investimento de medio millón de euros
A Deputación da Coruña destinou preto de medio millón de euros a programas de promoción económica en 34 concellos da provincia ao longo deste 2024. Estas axudas, dirixidas a municipios de menos de 50.000 habitantes, teñen como obxectivo fomentar o desenvolvemento económico, reforzar o comercio e a hostalería locais, e promover os produtos de calidade da contorna.
O Boletín Oficial da Provincia (BOP) publicou o pasado 5 de decembro a concesión provisional destas subvencións, que suman un total de 497.710,57 euros. As contías asignadas oscilan entre os 9.000 e os 42.000 euros por proxecto, apoiando iniciativas como feiras gastronómicas, festas tradicionais e campañas de dinamización do comercio local.
Apoio a feiras e produtos locais
Entre os eventos subvencionados destacan celebracións de gran relevancia no ámbito gastronómico e turístico como a Semana da Tortilla de Betanzos, a Festa do Galo de Arteixo, a Festa da Empanada de Carral, a Festa da Pataca de Coristanco, a Festa do Polbo de Mugardos ou ArteMar en Ribeira. Tamén se inclúen eventos recoñecidos como a Festa do Melindre de Melide, a Festa do Pan de Neda ou a Festa da Sardiña Lañada de Cariño, que contribúen a poñer en valor os produtos locais e atraer visitantes.
Campañas de dinamización comercial
A Deputación tamén financiou programas específicos para revitalizar o comercio local en concellos como Bergondo, Brión, Laxe, Camariñas, Noia, Negreira, Vimianzo e Vedra. Ademais, apoiáronse campañas especiais de Nadal en vilas como Carballo, Carnota, Corcubión, Culleredo, Fisterra e Outes, que inclúen actividades como a decoración de zonas comerciais, animación urbana e accións para fidelizar clientes.
Novas bases para 2025
A institución provincial xa publicou as bases reguladoras para as subvencións de 2025, incrementando o orzamento ata os 700.000 euros. Segundo se detalla na convocatoria, estas axudas continuarán apoiando accións destinadas ao desenvolvemento económico, o emprego e a promoción do comercio e a hostalería local.
Entre as iniciativas subvencionables destacan feiras de artesanía, exaltación de produtos locais, actividades de animación comercial e campañas de fidelización, así como xornadas e seminarios vinculados á promoción económica da provincia.