A Deputación estudará a mellora da estrada que une Aranga e Irixoa por Altos de Verís e O Gallado
A Deputación da Coruña estudará a mellora da estrada que conecta os municipios de Aranga e Irixoa polos lugares de Altos de Verís e O Gallado. O presidente provincial, Valentín González Formoso, reuniuse este martes cos alcaldes de Aranga, Alberto Platas, e Irixoa, Antonio Deibe, para coñecer o proxecto elaborado conxuntamente polos dous concellos.
A proposta contempla a renovación do firme en tres treitos de titularidade municipal que suman algo máis de seis quilómetros de lonxitude. O obxectivo é mellorar unha vía utilizada a diario pola veciñanza, os servizos municipais e os vehículos vinculados ás actividades agrícolas e forestais da zona.
Durante o encontro, os rexedores explicaron que a estrada presenta un importante deterioro, con fochancas, fisuras, afundimentos e deficiencias na drenaxe. Ademais, lembraron que a última actuación realizada neste itinerario tivo lugar hai catorce anos, polo que consideran prioritaria a súa rehabilitación.
Segundo o proxecto presentado, as obras incluirían a limpeza e recuperación das cunetas, a mellora da drenaxe, o acondicionamento do firme e a aplicación dunha nova capa de mestura bituminosa en quente de cinco centímetros de espesor para mellorar a seguridade da circulación.
Pola súa banda, Formoso confirmou o interese da Deputación por esta actuación debido ao carácter intermunicipal da estrada e ao seu papel na conexión entre ambos os concellos. Agora serán os servizos técnicos do organismo provincial os que analicen a proposta para avaliar as condicións necesarias e avanzar na súa posible execución.