A Deputación entrega os IV Premios 'Luísa Villalta' a oito proxectos pola igualdade
A área de igualdade da Deputación da Coruña fixo entrega este luns dos IV Premios 'Luísa Villalta' a oito proxectos que promoven a igualdade de xénero a través de múltiples disciplinas artísticas e sociais. Cada unha das propostas seleccionadas recibiu unha achega de 12.500 euros, sumando un total de 100.000 euros de investimento. Durante o acto, a deputada de Igualdade, Soledad Agra, entregou os galardóns, consistentes nunha peza creada en 2017 polo artista Xurxo Gómez Chao, baixo o título ‘Isto’, inspirada na obra poética de Luísa Villalta. Agra destacou a importancia destes premios “como ferramenta de sensibilización e transformación cara a unha sociedade máis xusta e igualitaria”.
Os proxectos premiados en 2024 son: ‘O próximo baile, será comigo’, de Sabela Losada Cortizas, unha iniciativa audiovisual que dá voz ás vítimas de violencia machista a través dunha rede de testemuños e apoio mutuo. ‘Ofuscadas polo vicio da razón’, de Yarama África, propón a creación dun espazo de encontro artístico para mulleres migrantes e refuxiadas, inspirado na obra de Luísa Villalta. A Asociación Cultural Alexandre Bóveda presentou ‘Non calarás’, un proxecto historiográfico centrado na recuperación da memoria das mulleres na cidade da Coruña. Pola súa parte, Illa Bufarda foi premiada con ‘Altas luces’, unha proposta que visibiliza a contribución das mulleres á historia da fotografía galega.
Outros proxectos destacados foron ‘A historia vaxenial’, de Artyc Content, que aborda a representación cultural do corpo feminino e a desigualdade de xénero a través do teatro, e ‘Punto en boca. Costura e teatro’, de Raquel García Crespo, que afonda no oficio tradicional da costura como herdanza xeracional e medio de vida feminino. Tamén foi premiado ‘As mulleres no xornalismo galego: a crónica revelada’, do Colexio Profesional de Xornalistas de Galicia, un libro que rescata o legado das pioneiras do xornalismo galego e destaca o seu papel nos medios de comunicación. Finalmente, Mala Herba Producións recibiu o galardón polo proxecto ‘A clase’, unha curtametraxe que aborda o acoso e abuso de poder nas escolas de arte dramática.
Os responsables das propostas premiadas agradeceron o apoio da Deputación e salientaron a relevancia deste tipo de recoñecementos para impulsar iniciativas que fomentan a igualdade e poñen en valor o papel das mulleres na sociedade.