A Deputación destina 70.000 euros ao Banco de Alimentos Rías Altas para compra de alimentos e contratación de persoal

ACoruñaXa
A colaboración económica da Deputación destinarase á adquisición de alimentos de primeira necesidade, gastos de soldos, salarios e cuotas á Seguridade Social de dúas coordinadoras e un conductor
Imaxe do presidente da Deputación asinando o convenio co Banco de Alimentos
Imaxe do presidente da Deputación asinando o convenio co Banco de Alimentos
9 Xul 2024

A Deputación da Coruña achegará 70.000 euros ao Banco de Alimentos Rías Altas (BALRIAL) para gastos derivados da adquisición de alimentos de primeira necesidade e contratación de persoal. Así o reflicte no convenio asinado entre o presidente da institución provincial, Valentín González Formoso, e o responsable do banco de alimentos, Manuel María Mora.

A colaboración económica da Deputación destinarase á adquisición de alimentos de primeira necesidade, gastos de soldos, salarios e cuotas á Seguridade Social de dúas coordinadoras e un conductor.

Por unha banda, a adquisición destes produtos forma parte do apoio alimentario, a principal razón de ser dos Bancos de Alimentos, que loitan contra a exclusión e a pobreza poñendo comida á disposición das familias en situación de precariedade. Ademais, a súa labor axuda a loitar contra o mal uso dos alimentos e evitar o desperdicio.

Neste sentido, cómpre destacar que no ano 2022, case un de cada catro galegos e galegas estaba en risco de pobreza ou exclusión social. Ademais, durante o 2023, só o BALRIAL contou con 27.111 persoas beneficiarias a través de 151 entidades e repartiu máis de 2.300.000 quilos de alimento.

Por outra banda, a contratación de persoal para algúns postos de traballo resulta fundamental para os Bancos de Alimentos. A pesares de que a súa labor está sustentada por voluntariado, existen funcións específicas que requiren de profesionais remunerados para garantir unha boa xestión. Precisamente por isto, o Banco de Alimentos das Rías Altas precisa dar continuidade aos dous postos de coordinadores a media xornada, ademais de a un condutor a media xornada responsable do transporte na área da Coruña.

0.16516613960266