A Deputación da Coruña repartirá 42.000 euros entre entidades sociais da provincia con novos premios de boas prácticas
A Deputación da Coruña abriu unha nova convocatoria dos seus Premios de Boas Prácticas en Servizos Sociais, que este ano alcanzan a súa sexta edición cunha dotación total de 42.000 euros. A iniciativa busca poñer en valor o traballo das entidades sociais da provincia e recoñecer aqueles proxectos que contribúan a mellorar o benestar da cidadanía e a atención aos colectivos máis vulnerables.
A convocatoria contempla seis premios de 7.000 euros. Cinco deles estarán destinados a proxectos concretos e o sexto servirá para distinguir a traxectoria dunha entidade polo seu labor continuado no ámbito dos servizos sociais.
No apartado de proxectos, os premios estarán repartidos en cinco categorías: investigación científica aplicada aos servizos sociais, iniciativas desenvolvidas no ámbito rural, persoas maiores, discapacidade e dependencia, familia, infancia e adolescencia, e inclusión social.
Poden optar aos galardóns as entidades sen ánimo de lucro do ámbito dos servizos sociais que desenvolvan a súa actividade na provincia da Coruña e estean inscritas como entidades de iniciativa social no Rexistro único de entidades prestadoras de servizos sociais da Xunta de Galicia.
A Deputación pretende así impulsar propostas innovadoras e iniciativas capaces de ofrecer respostas ás necesidades sociais existentes, ademais de recoñecer o traballo desenvolvido ao longo dos anos polo tecido asociativo da provincia.
As entidades que resultasen premiadas nalgunha das dúas edicións anteriores non poderán volver obter un galardón nesta convocatoria. No caso de que algunha das categorías quede deserta, o xurado poderá conceder máis dun premio noutras modalidades, sempre mantendo o límite de cinco proxectos premiados.
As solicitudes poderán presentarse en setembro
O prazo para presentar as candidaturas comezará o 1 de setembro de 2026 e permanecerá aberto ata as 14.00 horas do 30 de setembro.
Tanto a presentación das solicitudes como o resto da tramitación deberán realizarse por vía telemática a través da plataforma SUBTEL, dispoñible na sede electrónica da Deputación da Coruña.