A Deputación da Coruña licita por 937.000 euros a mellora de dúas estradas en Oza-Cesuras
A Deputación da Coruña sacou a licitación dous proxectos para renovar o firme de estradas provinciais ao seu paso por Oza-Cesuras. As intervencións suman un orzamento de 937.019,41 euros e permitirán actuar sobre algo máis de nove quilómetros das vías DP-3203 e DP-0106, co propósito de mellorar a seguridade viaria e as condicións de circulación. O prazo para presentar ofertas remata o 3 de novembro.
A primeira actuación céntrase na estrada DP-3203, entre os puntos quilométricos 8,400 e 12,500, nun treito de 4,1 quilómetros. O orzamento de licitación ascende a 405.170,35 euros.
Os traballos previstos permitirán corrixir os deterioros do pavimento provocados polo tráfico e as condicións meteorolóxicas. O proxecto contempla reparar de maneira puntual as zonas máis danadas e estender unha nova capa de mestura bituminosa en quente sobre unha superficie de 32.980 metros cadrados. Ademais, renovaranse as marcas viarias e instalarase nova sinalización vertical para reforzar a seguridade dos usuarios.
MÁIS ACTUACIÓNS
A segunda obra desenvolverase na DP-0106, que comunica San Vicente de Vigo con Oza dos Ríos, entre os puntos quilométricos 3,230 e 8,200. O tramo afectado rolda os cinco quilómetros e conta cun orzamento de 531.849,06 euros.
Neste caso, a intervención inclúe a reparación dos puntos onde se producen afundimentos e a colocación dunha nova capa de asfalto de cinco centímetros de grosor. As tarefas completaranse coa limpeza e apertura de cunetas, a roza dos noiros, o acondicionamento dos elementos de drenaxe e a poda das árbores que poidan representar un perigo para a circulación.
O proxecto tamén prevé renovar a sinalización horizontal e adaptar as tapas dos pozos de rexistro e dos sumidoiros á nova cota do pavimento.
As dúas actuacións teñen un prazo estimado de execución de tres meses desde o inicio dos traballos. As obras realizaranse por marxes para manter un carril aberto ao tráfico durante a súa realización e facilitar así os desprazamentos pola zona.