A Deputación da Coruña entrega unha furgoneta á Fundación Hospitalarias Betanzos para apoiar os desprazamentos do Centro Ocupacional Integrado na Comunidade
A deputada de Política Social, Mar García Vidal, visitou este mércores a sede da entidade, onde fixo entrega do vehículo xunto coa directora xerente da fundación, Imma Segarra, e dúas das persoas usuarias do centro, Charo Pillado e José María Costoya.
O vehículo permitirá mellorar a participación das 18 persoas con discapacidade intelectual que forman parte do programa e que proceden de Betanzos, Abegondo, Oza-Cesuras e Cambre. Os desprazamentos facilitarán a súa asistencia a actividades deportivas, culturais, ocupacionais e de lecer desenvolvidas en diferentes espazos da súa contorna.
García Vidal destacou que favorecer a participación na vida comunitaria tamén forma parte do proceso de autonomía das persoas con discapacidade intelectual. A deputada puxo en valor, neste sentido, o traballo desenvolvido pola Fundación Hospitalarias Betanzos e a colaboración coas entidades sociais para responder ás necesidades das persoas usuarias e das súas familias.
Un modelo que aposta pola integración na comunidade
O Centro Ocupacional Integrado na Comunidade, situado na praza García Hermanos de Betanzos, comezou a funcionar en 2024 como unha iniciativa pioneira en Galicia.
O seu modelo combina actividades ocupacionais e prelaborais con propostas deportivas, culturais e de lecer desenvolvidas en espazos compartidos coa cidadanía, como instalacións deportivas, bibliotecas e establecementos da contorna.
Este sistema permite ás persoas usuarias traballar habilidades relacionadas coa vida diaria, establecer relacións sociais e participar de maneira activa na comunidade. O novo vehículo facilitará os desprazamentos necesarios para acceder a estas actividades.
Máis de 300 persoas atendidas
A Fundación Hospitalarias Betanzos, anteriormente coñecida como Centro Pai Menni, conta cunha traxectoria de atención ás persoas con discapacidade que se remonta a 1923.
Na actualidade, a entidade atende a máis de 300 persoas e dispón de diferentes servizos, entre eles atención residencial, vivenda tutelada, centro de día e centro ocupacional, cun equipo multidisciplinar de profesionais.