A Deputación da Coruña destina 250.000 euros ao Festival Noroeste para reforzar a súa 39ª edición
A Deputación da Coruña destinará 250.000 euros á organización da 39ª edición do Festival Noroeste Estrella Galicia, que se celebrará na cidade entre o 5 e o 8 de agosto. O presidente da institución provincial, Valentín González Formoso, e o concelleiro de Cultura e Turismo da Coruña e vicepresidente do Instituto Municipal Coruña Espectáculos (IMCE), Gonzalo Castro, asinaron este venres o protocolo que establece as bases da colaboración entre ambas as administracións.
O festival contará cun orzamento total de 550.000 euros, dos que a Deputación achegará o 45,45 %, mentres que o IMCE asumirá os 300.000 euros restantes. A colaboración formalizarase posteriormente mediante un convenio que deberá recibir o visto e prace do pleno provincial.
Durante a sinatura, Formoso destacou que o Noroeste é "unha das grandes citas culturais do verán galego" e un evento cunha importante capacidade para atraer visitantes e proxectar tanto a cidade como o conxunto da provincia. Pola súa banda, Gonzalo Castro subliñou a importancia da colaboración entre administracións para seguir impulsando un festival consolidado e gratuíto.
A edición deste ano ofrecerá máis de 40 concertos repartidos entre sete escenarios: a praia de Riazor, a praza de María Pita, a praza de Azcárraga, o Campo da Leña, o parque de Santa Margarida, o Castelo de San Antón e O Portiño.
O cartel inclúe artistas internacionais e nacionais como Bomba Estéreo, Echo & The Bunnymen, Rusowsky, Yerai Cortés, Sprints, Ángel Stanich, Dorian, Fantastic Negrito, Bongeziwe Mabandla, Mari Froes e Frankie and the Witch Fingers.
A música galega volverá ter un peso destacado na programación, representando máis da metade das actuacións, con nomes como Sés, Bala, Xosé Lois Romero & Aliboria, Familia Caamagno, Orquestra do Quince, Moura, Agoraphobia, Ruxe Ruxe, Catuxa Salom e Zënzar.
Todos os concertos serán gratuítos e ofrecerán unha ampla variedade de estilos musicais, desde o rock, o pop e a electrónica ata o folk, o jazz, o rhythm and blues, o flamenco ou as músicas africanas.
Na edición de 2025, o Festival Noroeste congregou a máis de 115.000 persoas, unha cifra que consolida a súa posición como unha das principais citas culturais e musicais do verán en Galicia.