A Deputación apoia a mensaxe inclusiva do documental 'Lo imposible se hará'
A Deputación da Coruña participou este mércores na presentación do documental 'Lo imposible se hará', unha peza impulsada por Plena Inclusión España que recolle historias reais de persoas con discapacidade intelectual e do desenvolvemento. A proxección formou parte dunha xornada organizada por ASPADISOL na sede da Fundación Paideia.
O encontro serviu para abrir un espazo de reflexión arredor da inclusión, da vida independente e da importancia de garantir os apoios necesarios para que todas as persoas poidan participar plenamente na comunidade. A cita contou coa presenza da deputada provincial de Política Social, Mar García Vidal, así como da directora de ASPADISOL, Yolanda Prieto López, do presidente de FADEMGA, Eladio Fernández Pérez, de protagonistas do documental e de profesionais do ámbito da discapacidade.
A obra pon o acento nas capacidades, nos proxectos vitais e nos retos que afrontan as persoas con discapacidade intelectual. A través de experiencias concretas, o documental reivindica o dereito a decidir, a desenvolver unha vida autónoma e a contar cunha contorna accesible, inclusiva e comprometida.
Durante a presentación, García Vidal destacou que este tipo de iniciativas axudan a poñer voz e rostro a unha realidade que debe ocupar un lugar central nas políticas públicas. A deputada tamén puxo en valor o labor diario de entidades como ASPADISOL, que acompañan ás persoas con discapacidade e ás súas familias, ao tempo que contribúen a construír unha sociedade máis xusta.
A Deputación subliña que mantén unha liña de colaboración estable co tecido asociativo social da provincia para reforzar programas, recursos e servizos destinados ás persoas que máis apoio precisan. A mensaxe da xornada foi clara: con confianza, accesibilidade e compromiso colectivo, moitas barreiras poden deixar de selo.