A Delegación do Goberno celebra un acto institucional na Coruña reafirmando o compromiso con Galicia
O delegado do Goberno en Galicia, Pedro Blanco, reivindicou este xoves o protagonismo da Delegación do Goberno como garante de “que a voz de Galicia se escoite en Madrid e para que a acción do Goberno de España chegue a cada galego, ata o último recuncho da nosa terra”. Así o fixo hoxe un acto institucional de recoñecemento ao papel desenvolvido pola Delegación do Goberno a través dos 13 delegados que ostentaron a máxima responsabilidade do Goberno de España na Comunidade Autónoma de Galicia nestes anos.
Pedro Blanco reafirmou o “compromiso persoal e político” que asumiu co seu nomeamento como delegado hai un ano. Subliñou o valor da Delegación “porque o Goberno de España, a través da Delegación, está presente na vida diaria das persoas, no máis relevante e no cotián: nas becas dos nosos fillos, nas pensións dos nosos maiores, na mellora da iluminación ou o abastecemento da auga, na rehabilitación das nosas vivendas e no impulso á nosa industria”. Nesta tarefa tivo palabras de agradecemento para todas as “traballadoras e traballadores públicos que serviron á cidadanía desde a Delegación do Goberno, pois eles son os verdadeiros protagonistas da acción do Goberno no territorio”.
Acto de recoñecemento público
O delegado presidiu o acto que se celebrou no MUNCYT da Coruña e que fixo un percorrido pola historia da Delegación a través da testemuña das persoas que ostentaron o cargo de delegado do Goberno e das súas familias. Consistiu nun coloquio moderado polo xornalista Pablo Portabales e que contou coa participación de Pedro Blanco, actual delegado, xunto cos seus antecesores Juan Manuel Diz Guedes, Arsenio Fernández de Mesa, Manuel Ameijeiras, Santiago Villanueva, Javier Losada, José Manuel Miñones e José Ramón Gómez Besteiro. Con eles compartiron a súa experiencia Teresa García-Sabell, filla do primeiro delegado do Goberno, e Ana Romero, esposa de Xosé Manuel Pose Mesura. Nesta conversa, todos os asistentes repasaron as súas experiencias no cargo e coincidiron en sinalar o servizo público que presta a Galicia a institución da Delegación.
Tras o coloquio, os delegados e familiares foron obsequiados cunha reprodución en cerámica de Sargadelos do edificio sede actual da Delegación do Goberno.
Tamén se presentou publicamente a galería de retratos fotográficos dos 13 delegados do Goberno, que a partir de mañá estarán expostos na sede da Praza de Ourense como lembranza das persoas que ostentaron a máxima representación do Goberno na Comunidade.
Esta celebración contou coa asistencia de numerosas autoridades e responsables da Administración Autonómica, Local, Xudicial e Militar así como das Forzas e Corpos de Seguridade, colectivos veciñais, asociacións, entidades benéficas e culturais de distinto tipo. Entre as autoridades estaba o conselleiro de Presidencia, Xustiza e Deportes, Diego Calvo; as alcaldesas da Coruña, Inés Rey, de Lugo, Paula Alvarellos, e de Santiago de Compostela, Goretti Sanmartín; a Valedora do Pobo, o Fiscal Superior de Galicia, a subdelegada do Goberno na Coruña e o subdelegado do Goberno en Ourense.
A Delegación do Goberno en Galicia
A Delegación do Goberno, creada pola Constitución do 78, comezou a funcionar en Galicia, na cidade da Coruña, en 1981, pouco despois da entrada en vigor do Estatuto de Autonomía de Galicia e do comezo da Comunidade Autónoma. Desde o ano 1981 foron 13 os delegados que ostentaron a titularidade do organismo. A García-Sabell seguiulle en 1996 Juan Manuel Diz Guedes; Arsenio Fernández de Mesa, en 2000; Manuel Ameijeiras Vales, en 2004; Antón Louro Goyanes entre 2009 e 2011; Miguel Ángel Cortizo Nieto no ano 2011; seguido por José Manuel Pose Mesura, ata 2012. En 2012 tomou o relevo Samuel Juárez Casado, que ostentou o posto ata 2014, data na que o relevou Santiago Villanueva Álvarez, ata o ano 2018. En 2018 foi nomeado delegado Javier Losada de Azpiazu; que cedeu o posto a José Manuel Miñones Conde, ata o ano 2023. Ese ano foi nomeado delegado José Ramón Gómez Besteiro, quen foi sucedido polo actual responsable, Pedro Blanco Lobeiras.
Tras unha estancia provisional na sede do Goberno Civil (actual Subdelegación do Goberno) o 7 de decembro de 1981 a Delegación mudouse ás instalacións situadas na Praza de Pontevedra, pertencentes á Delegación Provincial do Ministerio de Cultura. Este sería o emprazamento no que atentou o Exército Gerrilheiro na noite do 17 de decembro do ano 1987, causando importantes danos materiais. En novembro de 1990, a Delegación do Goberno trasladouse definitivamente ao actual edificio da Praza de Ourense, antiga sede de Obras Públicas.