Cultura

O festival Quincegotas celebra a súa novena edición do 9 ao 11 de outubro e incorpora por primeira vez a praza de María Pita como escenario

A danza contemporánea sairá dos escenarios convencionais para ocupar diferentes espazos da Coruña durante esta fin de semana. O festival Quincegotas celebrará a súa novena edición do 9 ao 11 de outubro cun total de 14 propostas artísticas repartidas entre catro localizacións da cidade.

A programación desenvolverase na escalinata da Domus, a Cúpula do parque de Eirís, a praza da Fábrica de Tabacos e, como principal novidade desta edición, a praza de María Pita, que acollerá a xornada de clausura.

O festival arrancará o venres 9 de outubro ás 18.00 horas na escalinata da Domus. A primeira xornada contará con 'SOMA', do CDAN Lugo; 'Diferencial', do Conservatorio Profesional de Danza da Deputación da Coruña; 'Derivé', de Riart Company; e 'Lo que los árboles no cuentan', interpretada polos bailaríns Héctor Plaza e Kiko López.

A actividade continuará o sábado 10 pola mañá na Cúpula do parque de Eirís coa sección 'Quincegotas Emerxente', dedicada a novos nomes e propostas da danza contemporánea. O público poderá asistir ás pezas 'Tánguela', de Myriam González; 'A vergonza era verde e comeuna a vaca', de Alicia López; 'Threadscap', de Samuel Galán; e 'Pensar a contratiempo', de Suevia Rojo.

Pola tarde, a programación trasladarase á praza da Fábrica de Tabacos, onde se representarán 'Mover Cenizas', de Maruxa Salas e Erick Jiménez; 'Extender como si pudiera', de Julia Laport; e '(En Blanco)', do Colectivo Dexeito.

A última xornada terá como escenario a praza de María Pita, incorporada por primeira vez ao percorrido do festival. A clausura será o domingo 11 de outubro a partir das 18.00 horas, con tres propostas: 'Recreo', da Meraki Cía; 'Campo Abierto', de María Garzaráin; e 'Manifesto', de Ángel Duran.

A aposta de Quincegotas pasa por achegar a danza contemporánea ao espazo público e favorecer un contacto máis directo entre artistas e espectadores. Deste xeito, os lugares habituais da cidade convértense en parte das propias pezas e permiten achegar estas linguaxes escénicas a públicos que non sempre acoden aos espazos culturais convencionais.

A incorporación de María Pita amplía ademais o percorrido do festival e suma un dos principais espazos urbanos da cidade a unha programación que combina artistas consolidados e novas voces da creación contemporánea.