A cosmética natural volve a Monticaño cun novo obradoiro práctico en Arteixo
Arteixo abrirá o 25 de abril unha nova edición do seu curso de cosmética natural, unha proposta dirixida a persoas afeccionadas á ecoartesanía que queiran iniciarse na elaboración de produtos sinxelos para o coidado da pel e do cabelo a partir de ingredientes naturais, seguros e respectuosos coa saúde e co medio ambiente.
A actividade, que alcanza a súa segunda edición, busca achegar ao alumnado os principios básicos da cosmética natural e fomentar ao mesmo tempo un consumo máis responsable e consciente. A intención é ofrecer alternativas aos produtos industriais habituais, reducindo tamén o uso de envases innecesarios.
O curso estará impartido por Nines Domínguez e terá un nivel de iniciación, polo que está pensado para persoas sen experiencia previa que desexen coñecer os fundamentos desta práctica e dar os seus primeiros pasos na elaboración artesanal de cosméticos.
O programa formativo abordará cuestións como os conceptos básicos da cosmética natural e os seus beneficios, as diferenzas con respecto á cosmética convencional e o uso de ingredientes como aceites vexetais, manteigas, ceras, extractos naturais, hidrolatos e aceites esenciais. A formación incluirá tamén contidos sobre hixiene, conservación e boas prácticas durante o proceso de elaboración.
A parte máis práctica do curso permitirá ás persoas participantes preparar distintos produtos cosméticos naturais, entre eles unha crema hidratante, unha crema corporal e un bálsamo labial, que poderán levar ao remate da sesión.
A actividade celebrarase o sábado 25 de abril, de 10.00 a 14.00 horas, no Parque Municipal de Monticaño, na Pastoriza. O prezo da inscrición será de 25 euros para persoas empadroadas en Arteixo, clientes de Sumarte e colectivos asimilados, mentres que a tarifa xeral será de 35 euros.
O curso contará con 15 prazas, que se asignarán por orde de inscrición, aínda que terán prioridade as persoas empadroadas no concello e os clientes de Sumarte, Servizo Municipal de Augas, e de BiciArteixo. As solicitudes que queden fóra nesta convocatoria pasarán a ser chamadas para unha próxima edición.