A Coruña10 celebra os seus 20 anos con preto de 4.000 participantes e coa estrea de María Pita como meta
A Coruña10 celebrou este domingo a súa vixésima edición cunha participación próxima ás 4.000 persoas entre a carreira absoluta e as distintas probas de categorías inferiores. A xornada deixou como vencedores da proba principal a David de la Fuente Gómez, na categoría masculina, e Isabel Barreiro García, na feminina, nunha edición marcada tamén pola chegada por primeira vez á praza de María Pita.
A carreira absoluta, cun percorrido de 10 quilómetros, arrancou ás 10.00 horas e tivo como primeiro protagonista na nova liña de meta a David de la Fuente, do Club Atletismo Playas de Castellón. O corredor completou o trazado en 29 minutos e 47 segundos, impoñéndose con claridade na clasificación masculina.
O segundo posto foi para Denis Incutti Tellado, que cruzou a meta cun tempo de 30:18, mentres que Adrián Ben Montenegro ocupou a terceira posición cun rexistro de 30:40.
Na clasificación feminina, Isabel Barreiro, do CA Adidas, foi a máis rápida cun tempo de 34 minutos. Sandra González Fernández, da Escola Atlética Lucense, terminou segunda con 35 minutos, o mesmo rexistro que Sara Castillo Oñate, do Club Atletismo Feminino Celta, terceira clasificada.
A principal novidade desta XX Coruña10 foi precisamente o cambio de localización da meta. Por primeira vez desde o inicio da proba, a chegada situouse na praza de María Pita, un dos espazos máis representativos da cidade, que se converteu durante a mañá no punto de encontro de corredores, acompañantes e público.
O concelleiro de Deportes, Manuel Vázquez, destacou a consolidación da carreira tras dúas décadas de celebración. "A Coruña10 chega aos seus vinte anos consolidada como unha das grandes citas do deporte popular na nosa cidade", sinalou, subliñando a resposta dos participantes e o ambiente xerado nas rúas coruñesas.
Vázquez tamén puxo o foco na incorporación de María Pita ao percorrido da proba. "Esta vixésima edición supuxo ademais un paso máis na traxectoria da Coruña10 coa chegada por primeira vez a María Pita, un espazo emblemático da cidade que hoxe se converteu tamén no punto de encontro das persoas participantes e do público", engadiu.
A elevada participación volveu ser outro dos sinais da importancia adquirida pola Coruña10 no calendario do atletismo popular. Os 3.000 dorsais postos inicialmente á disposición para a carreira absoluta esgotáronse con máis dun mes de antelación, aos que se engadiron posteriormente as persoas participantes nas diferentes probas destinadas ás categorías inferiores.
Despois da carreira absoluta, a actividade continuou coas probas de menores, completando unha mañá dedicada tanto ao atletismo popular como ao deporte de base. Entre todas as categorías, a organización contabilizou preto de 4.000 participantes nesta vixésima edición.
A celebración da Coruña10 tamén tivo incidencia na actividade turística da cidade durante a fin de semana. O Concello e Hospeco alcanzaron este ano un acordo polo que once establecementos hoteleiros ofreceron descontos nas estadías con motivo da carreira, facilitando así o aloxamento dos participantes e dos seus acompañantes desprazados ata A Coruña.
A XX Coruña10 pechou deste xeito unha nova edición dunha das probas máis destacadas do deporte popular coruñés. O aniversario deixou, ademais, unha nova imaxe para a carreira coa praza de María Pita como escenario da chegada e cunha elevada resposta por parte dos participantes.