A Coruña renuncia ao Mundial 2030 e abre unha nova etapa co Dépor para reformar Riazor
A Coruña renunciou este luns, 16 de marzo, a seguir na carreira para ser sede do Mundial de fútbol de 2030 e abriu ao mesmo tempo unha nova etapa co Deportivo para impulsar a modernización de Riazor. A alcaldesa, Inés Rey, e o presidente do club, Juan Carlos Escotet, compareceron xuntos para escenificar o acordo e presentar un novo marco de colaboración arredor do estadio e da súa contorna, nun proxecto que tamén conta coa implicación da Deputación.
Rey xustificou a retirada asegurando que as esixencias da FIFA, 'máis alá do aforo', facían o proxecto 'practicamente inviable'. A rexedora sostivo que o Concello acudira á candidatura con optimismo e confiando en que as condicións se puidesen adaptar á realidade da cidade, pero finalmente houbo que 'elixir e tomar unha decisión'. Na súa opinión, manter a vía do Mundial suporía hipotecar A Coruña e tamén o Deportivo, non só polo custo económico, senón polo impacto na mobilidade e polas actuacións en infraestruturas que se reclamaban para un evento de duración moi limitada e sen retorno garantido.
A alcaldesa defendeu que a renuncia é unha 'decisión sensata e responsable' e insistiu en que a cidade non abandona a reforma do recinto. 'O Mundial era un medio, non un fin', resumiu. Segundo explicou, o obxectivo agora é desenvolver un proxecto 'igual de ilusionante e ambicioso' para modernizar o complexo de Riazor (o estadio, o Palacio de Deportes e o conxunto do seu entorno deportivo) e favorecer un uso do espazo durante os 365 días do ano, con posibilidades tamén para actividades culturais e sociais. Concello e Deportivo crearán unha comisión conxunta para definir a actuación, aínda sen concretar por agora prazos, cifras ou porcentaxes de financiamento.
En paralelo, a decisión do goberno local intensificou a confrontación política en María Pita. O portavoz do PP, Miguel Lorenzo, elevou o ton contra Inés Rey e acusouna de levar a cidade 'da máxima ilusión á máxima decepción', ao entender que a renuncia evidencia o fracaso dun proxecto que o executivo presentara como estratéxico para A Coruña.
Ademais, o anuncio chega tras varios días de presión política do PP, que viña reclamando explicacións ao goberno local polo estado real da candidatura. Os populares pediron a convocatoria urxente da comisión especial do Mundial, acceso a toda a documentación e que todos os grupos municipais puidesen estar presentes na visita prevista da FIFA do 18 de marzo. O portavoz popular, Miguel Lorenzo, advertira da falta de información sobre as xestións do executivo e da ausencia de avances visibles en financiamento, planificación e execución, nun asunto que definiu como 'estratéxico' e de 'cidade'.