A Coruña reforza a seguridade e a mobilidade polo Nadal co dispositivo ‘Comercio Seguro’
O Concello da Coruña activou este luns o dispositivo especial de seguridade de Nadal ‘Comercio Seguro’, que estará operativo ata o 8 de xaneiro. O obxectivo é reforzar a seguridade nas rúas e garantir a mobilidade durante as festas, ante o incremento previsto da afluencia de persoas nas zonas comerciais e os desprazamentos en transporte público e vehículos particulares.
A concelleira de Seguridade Cidadá e Interior, Montserrat Paz, destacou que o dispositivo contará cunha maior presenza da Policía Local en puntos clave da cidade, como a rúa Barcelona, a zona centro, Catro Camiños, A Cubela —incluíndo rúas como Alcalde Marchesi, Ramón y Cajal e Alcalde Pérez Ardá— e o centro comercial Marineda City. Estas patrullas, tanto a pé como en vehículos, teñen como finalidade disuadir posibles feitos delictivos.
Dentro das iniciativas do Concello, destaca tamén o proxecto piloto dunha aplicación móbil para comerciantes, presentada recentemente pola alcaldesa. Esta ferramenta, que se está probando nos barrios da Agra do Orzán e Catro Camiños, permite aos negocios adheridos contactar directamente coa Policía Local en caso de emerxencia, facilitando intervencións rápidas.
Medidas de mobilidade e controis itinerantes
O dispositivo especial tamén se centrará na mobilidade, cunha planificación destinada a axilizar o tráfico nas principais arterias da cidade e mellorar a fluidez do transporte público, especialmente nas liñas que pasan preto de grandes superficies comerciais como Catro Camiños ou Marineda City.
Ademais, haberá controis viarios itinerantes para fomentar a seguridade ao volante. “É importante actuar con responsabilidade ao volante, pensando na seguridade de todas as persoas que nos rodean”, indicou Montserrat Paz.
Colaboración entre unidades
O plan implicará unha coordinación entre diversas unidades da Policía Local, como o Centro Integral de Mobilidade (CiMob), a sala do 092 e as áreas de seguridade en edificios, atestados de tráfico e disciplina viaria. A sala de control de tráfico xogará un papel clave ao adaptar os ciclos semafóricos ás necesidades de circulación en cada momento.
A medida contará tamén co apoio de axentes da Policía Nacional, reforzando a vixilancia e seguridade nas rúas da cidade durante este período.