A Coruña licitará a reurbanización dos Cantóns antes de finais de ano
O Concello da Coruña anunciou que as obras de reurbanización dos Cantóns serán licitadas antes de que remate 2024, tal e como se aprobou no pleno municipal celebrado este xoves. Esta actuación marcará o inicio da fase cero da nova fachada marítima da cidade, co obxectivo de crear espazos máis accesibles e pensados para a cidadanía, recuperando o vínculo coa zona portuaria e mellorando a continuidade peonil.
Segundo explicou o concelleiro de Economía e Planificación Estratéxica, José Manuel Lage, esta reurbanización, cun orzamento de 8 millóns de euros, forma parte dun proxecto máis amplo que busca adaptar os Cantóns ás condicións da Zona de Baixas Emisións, reducindo o tráfico motorizado e incrementando os espazos para peóns. "Será unha intervención clave para consolidar o que comezou durante a pandemia, coa mellora e ampliación das áreas peonís entre a Autoridade Portuaria e a Praza de Mina", destacou Lage.
O proxecto non implicará un incremento da débeda municipal, xa que se realizarán cambios nas partidas de financiamento dispoñibles sen comprometer outros proxectos en marcha. A remodelación dos Cantóns buscará facilitar o tránsito entre a rúa Real e a praza de Lugo, así como promover unha maior integración cos xardíns de Méndez Núñez e o porto, reforzando a conexión entre a cidade e a súa fachada marítima.