A Coruña inaugura a exposición 'Recuérdame', un proxecto que une xeracións a través da emoción e a memoria
A Fundación Luis Seoane acolle desde o 18 de decembro ata o 13 de xaneiro a exposición 'Recuérdame', un proxecto interxeracional que pon en valor a unión entre xeracións a través das emocións e a convivencia. A alcaldesa, Inés Rey, inaugurou esta tarde a mostra acompañada por Felicidad López, directora da Escola Infantil Municipal Luis Seoane.
A exposición recolle o traballo conxunto realizado durante o último ano entre a Escola Infantil Municipal Luis Seoane e a Residencia para Maiores Torrente Ballester. Esta iniciativa, que naceu no curso 2022-2023, desenvolveuse a través de encontros mensuais nos que participaron tanto os nenos como os residentes, levando a cabo actividades como obradoiros de plástica, música, lectura, psicomotricidade e excursións. O obxectivo do proxecto é estimular a aprendizaxe e a creatividade, así como fortalecer os lazos emocionais entre as xeracións.
Durante o acto de inauguración, a alcaldesa Inés Rey destacou a profundidade das relacións que xorden deste tipo de proxectos. “O impacto non está só nas actividades que realizan, senón nos vínculos emocionais que se crean entre eles”, afirmou. Ademais, puxo o foco na necesidade de combater a soidade non desexada, un problema crecente na sociedade actual. “O ritmo veloz, case ansioso no que estamos instalados non nos permite deixar tempo á reflexión e ao compartir. Así, hoxe moitos dos nosos maiores atópanse sós sen desexalo e os nosos pequenos, tamén”, engadiu Rey, incidindo na importancia de coidar a memoria colectiva e recoñecer o papel fundamental dos maiores como gardiáns das historias que definen a cidade e a súa identidade.
Na exposición participan 13 nenas e nenos de 3 anos, acompañados das súas familias, así como 11 residentes da Residencia Torrente Ballester, que contaron co apoio da traballadora social Berta e do director do centro. Tamén asistiron á inauguración o concelleiro de Educación e Innovación Tecnolóxica, Juan Ignacio Borrego, e a concelleira de Benestar Social, Participación e Igualdade, Nereida Canosa. O persoal da Escola Infantil Municipal Luis Seoane, composto por 4 profesionais educativos e 3 membros do equipo directivo, tamén tivo un papel relevante no proxecto. A mostra conta co traballo de Antía García como fotógrafa e de María del Carmen Amarelo, responsable da montaxe.