Sociedade

A tecnoloxía satelital, a IA e Google Maps facilitarán a localización e uso destas prazas na cidade, grazas ao proxecto Spot4Dis, promovido pola AsoPMR e financiado por Google.org

A alcaldesa da Coruña, Inés Rey, e o tesoureiro da Asociación de Personas con Mobilidade Reducida (AsoPMR), Danilo Francesca, asinaron este xoves un convenio que permitirá á cidade formar parte do proxecto piloto Spot4Dis. Esta iniciativa, que utilizará tecnoloxía satelital, Street View, Intelixencia Artificial e Google Maps, ten como obxectivo identificar e mapear as prazas de aparcamento reservadas para persoas con mobilidade reducida (PMR).

O proxecto, seleccionado no concurso Google Impact Challenge: Tech for Social Good, recibiu 1,5 millóns de euros en financiamento e conta co apoio técnico de Google.org. Desenvolverase en cinco cidades europeas: A Coruña, Valencia, Zaragoza, Badajoz e Génova, coa finalidade de mellorar a accesibilidade urbana e ofrecer información útil para aumentar a autonomía das persoas con discapacidade.

Durante o acto de sinatura en María Pita, Inés Rey destacou que esta iniciativa reforza o compromiso da cidade coa accesibilidade e permitirá modernizar a xestión das prazas PMR. Ademais, anunciou que o Concello facilitará información actualizada das prazas existentes e previstas, así como a normativa vixente, e levará a cabo campañas de sensibilización para promover o uso desta nova ferramenta tecnolóxica.

A concelleira de Benestar Social, Nereida Canosa, subliñou que a cidade está avanzando na visibilización das prazas PMR, incorporando novos espazos en áreas clave como hospitais, centros cívicos e residencias da terceira idade.

A Coruña, un polo emerxente en Intelixencia Artificial

Miguel Escassi, director de Relacións Institucionais de Google España, participou por videoconferencia e destacou que o proxecto Spot4Dis representa un exemplo de como a tecnoloxía pode mellorar a vida das persoas, sen deixar a ninguén atrás. Ademais, identificou A Coruña como “un ecosistema emerxente da IA” grazas á próxima apertura da Axencia Española para a Supervisión da Intelixencia Artificial (AESIA).

Carlo Castellano, presidente da AsoPMR, afirmou que esta colaboración suporá un avance significativo na autonomía das persoas con mobilidade reducida, e anunciou que visitará A Coruña proximamente para supervisar os primeiros pasos do proxecto.

Esta iniciativa sitúa A Coruña na vangarda da accesibilidade urbana e confirma o seu compromiso coa innovación social e tecnolóxica.