A Coruña impulsa a escalada en nenos e nenas con tres actividades de iniciación
O Concello da Coruña, en colaboración coa Agrupación de Montañeros Independentes (AMI), organiza tres actividades de iniciación á escalada dirixidas a nenos e nenas de entre 6 e 16 anos. Estas xornadas, que se celebrarán os días 3, 4 e 5 de setembro, buscan achegar aos máis pequenos ao deporte da montaña e dar a coñecer as instalacións e cursos dispoñibles ao longo do ano.
Cada xornada está adaptada a unha franxa de idade específica, con 12 prazas dispoñibles por quenda. O 3 de setembro será a quenda para nenos e nenas de 6 a 8 anos, o 4 de setembro para os de 9 a 12 anos, e o 5 de setembro para os de 13 a 16 anos. A actividade terá lugar en horario de mañá e tarde. Pola mañá, de 11.30 a 13.00 horas, os participantes aprenderán a escalar con corda no Rocódromo Municipal de Riazor, mentres que pola tarde, de 16.00 a 17.30 horas, practicarán a modalidade de bloque nas instalacións da AMI, situadas na rúa Padre Sarmiento nº 8. O custo de participación é de cinco euros e as inscricións poden realizarse chamando ao 667967227 ata o día antes do inicio da actividade ou ata completar aforo.
Este programa é parte do convenio de colaboración asinado entre o Concello e a AMI, cunha dotación de 12.000 euros para promover o deporte de montaña na cidade. Ademais, o Goberno municipal de Inés Rey destinou en 2024 máis de 1,2 millóns de euros en convenios nominativos con entidades deportivas, co obxectivo de fomentar o deporte de base e dinamizar os clubs deportivos da Coruña.