A Coruña dedica dúas xornadas á escritora Syra Alonso, exiliada en México tras o asasinato do seu compañeiro
A figura da escritora coruñesa Syra Alonso será a protagonista de dúas xornadas de divulgación que se celebrarán este venres 6 e sábado 7 de novembro no Kiosco Alfonso da Coruña. O encontro reunirá unha vintena de escritores, investigadores, tradutores, artistas e especialistas para afondar na súa vida e obra, marcada pola represión franquista e o exilio.
As xornadas están organizadas pola Asociación para a Recuperación da Memoria Histórica (ARMH), coa colaboración do Concello da Coruña, a Deputación e Alvarellos Editora. A iniciativa coincide coa publicación de 'El mar tenía un amargo sabor a lágrimas. Memorias (1937-1945)', unha nova edición que incorpora manuscritos localizados recentemente en México por Conrado J. Arranz Mínguez.
Nacida na Coruña en 1899, Syra Alonso estivo vinculada aos ambientes artísticos da cidade e compartiu a súa vida co pintor de vangarda Francisco Miguel, con quen tivo tres fillos. Tras o golpe militar de 1936, o artista foi detido e asasinado en setembro dese ano. Ela sufriu a persecución e o illamento en Galicia antes de marchar ao exilio en México cos seus fillos. Alí rematou unhas memorias consideradas un importante testemuño documental e literario da represión franquista. Faleceu en 1970.
O programa comezará o venres ás 18.00 horas cunha primeira mesa coordinada por Consuelo Bautista, na que participarán Carme Vidal, Nerea González, Anxos Sumai e Tono Correa Corredoira. Ás 19.00 horas celebrarase unha segunda sesión, coordinada por Cristina González Novoa, con intervencións de Olivia Tudela, Olga Patiño, Rosario Mascato e Yirel de la O Molina.
O sábado, a actividade retomarase ás 11.00 horas cunha mesa coordinada por Jorge Calle, na que intervirán Xavier Seoane, María Valcárcel, Olga Novo, Ramón Nicolás e Miguel Anxo Fernán Vello. A última sesión terá lugar ás 12.00 horas, baixo a coordinación de Carmen Rodeja, e contará con Inmaculada Otero, Cesáreo Sánchez Iglesias, Olga Mahía e Conrado Arranz.
As intervencións abordarán diferentes dimensións da autora: a súa relación coa Coruña, a experiencia do exilio, a represión, a memoria, a perspectiva de xénero e o valor literario dos seus diarios. Tamén se analizarán o proceso de escritura e tradución das memorias e os novos materiais descubertos en México.