A Coruña asumirá a xestión da piscina de San Amaro e investirá máis de 1,3 millóns nos vestiarios da Torre
O Concello da Coruña encargará á Empresa Municipal de Vivenda, Servizos e Actividades (EMVSA) a xestión da piscina municipal climatizada cuberta de San Amaro, ata agora atendida polo Club do Mar. A decisión, adoptada de mutuo acordo coa entidade, busca garantir a continuidade dos cursos, das actividades deportivas e dos servizos que se desenvolven nas instalacións, ademais de acometer investimentos para mellorar o recinto.
O primeiro tenente de alcaldesa e voceiro municipal, José Manuel Lage, deu conta deste e doutros asuntos aprobados na Xunta de Goberno Local. Segundo explicou, o obxectivo é manter as prestacións actuais sen prexudicar o club e procurar que a piscina poida ofrecer un servizo en mellores condicións.
O investimento previsto para esta etapa de xestión ascende a uns 86.000 euros en 2026, 324.000 euros en 2027 e 198.000 euros en 2028. Nas instalacións desenvólvense tamén cursos e actividades das Escolas Deportivas Municipais, ademais dos servizos dirixidos aos socios do Club do Mar.
Máis de 654.000 euros para a segunda fase dos vestiarios da Torre
A Xunta de Goberno Local adxudicou tamén o contrato para a segunda fase da reforma dos vestiarios da Cidade Deportiva da Torre, cun orzamento superior aos 654.000 euros. Esta actuación sumarase á primeira fase, que xa está en marcha e conta cun investimento de máis de 850.000 euros.
O proxecto permitirá crear dous novos vestiarios para equipos mediante unha reorganización dos espazos. A distribución diferenciará as zonas de aseos e lavabos, os vestiarios —que ampliarán a súa capacidade— e as duchas.
A intervención incluirá a renovación dos acabados e das instalacións, a incorporación de climatización e sistemas de renovación do aire e a elección de materiais resistentes para reducir as necesidades de mantemento. Tamén se prevén melloras na eficiencia enerxética do edificio mediante unha fachada ventilada, illamento térmico e renovación das carpintarías exteriores.
As obras completaranse con actuacións na cuberta, incluídas a limpeza e a impermeabilización das baixantes. O obxectivo é aproveitar mellor os espazos e modernizar o inmoble mantendo a súa volumetría actual.
Máis horas de conserxería nos polideportivos municipais
O Concello aprobou unha modificación do lote 4 do contrato de conserxería dos edificios deportivos municipais para ampliar o servizo en 2.030,25 horas. A medida busca reforzar a atención nos polideportivos e facilitar o desenvolvemento das actividades ao longo do ano.
O horario de apertura adiantarase 15 minutos nos polideportivos da Sagrada Familia, San Francisco Xabier, o Barrio das Flores, o Ventorrillo, as instalacións polideportivas I e II da avenida da Habana, Novo Mesoiro e Os Rosales. No Palacio Municipal de Riazor incorporarase, ademais, unha quenda de luns a venres, das 8.30 ás 14.00 horas.
Coa modificación, o contrato garantirá un total de 100.147,25 horas anuais. O investimento anual ascenderá a 5.358.070,13 euros, 81.386 euros máis do previsto inicialmente.
Avanza a reparcelación do antigo Cuartel de Automóbiles
Outro dos acordos aprobados afecta ao antigo Cuartel de Automóbiles, na parcela coñecida como Acuartelamento da Grela, situada xunto á estrada de Baños de Arteixo. O Concello deu luz verde á proposta para liquidar o convenio asinado co Ministerio de Defensa, que se extinguirá por mutuo acordo entre as partes.
A liquidación permitirá concretar as obrigas e os compromisos asumidos por cada unha das entidades e avanzar no proxecto de reparcelación deste espazo, que leva anos sen uso. O Goberno local pretende urbanizar os terreos para habilitar novas dotacións públicas, especialmente instalacións que faciliten a loxística do transporte urbano de cara ao próximo contrato do servizo.
A proposta municipal contempla dispoñer de algo máis da metade da parcela, case 22.000 metros cadrados, cunha edificabilidade aproximada de 38.000 metros cadrados. Ademais de espazo para cocheiras, a superficie podería acoller outros servizos públicos que se consideren necesarios.