A Coruña aplicará unha rebaixa do 10% na tarifa do lixo durante tres meses
O Goberno local da Coruña aprobou hoxe na Xunta de Goberno unha rebaixa do 10% na taxa de recollida de lixo, que se aplicará durante tres meses en 2025. A medida, anunciada polo concelleiro de Economía e voceiro municipal, José Manuel Lage, busca compensar á cidadanía polos efectos da recente folga de recollida de residuos, que tivo un forte impacto na calidade do servizo durante o verán.
Lage explicou que a decisión baséase no compromiso do Concello de “compensar os veciños e veciñas da Coruña, que experimentaron as consecuencias dunha interrupción nun servizo esencial e de carácter público”. Para facer efectiva esta redución, o Concello levará a pleno unha proposta de modificación da ordenanza reguladora da tarifa de lixo.
A iniciativa forma parte dun conxunto de accións do Goberno municipal para responder ás demandas cidadás en relación cos servizos públicos e, ao mesmo tempo, subliña a vontade do Executivo da alcaldesa Inés Rey de poñer en marcha solucións prácticas para apoiar ás familias nun contexto de crecente custo de vida.