A Coruña acenderá o alumeado de Nadal o venres 4 de decembro

ACoruñaXa
A iluminación marcará o inicio oficial das festas na cidade, coincidindo coa apertura da Praza do Nadal en María Pita, que ofrecerá actividades de lecer, cultura e gastronomía todos os días ata o 5 de xaneiro
Nadal Coruña luces
22 Nov 2026

A Coruña xa ten data para dar a benvida ao Nadal. O acendido das luces será o venres 4 de decembro, segundo anunciou a alcaldesa, Inés Rey, que confirmou que a cidade inaugurará nesa mesma xornada a Praza do Nadal, instalada na praza de María Pita.

O acto servirá como punto de partida da programación festiva, que terá un dos seus principais escenarios no centro da cidade. María Pita contará cunha proposta de ocio, cultura e gastronomía, con actividade diaria ata o 5 de xaneiro, coincidindo coa celebración da cabalgata de Reis.

María Pita, epicentro da programación

A Praza do Nadal volverá converter a contorna do Pazo Municipal nun dos puntos de encontro destas festas. O recinto contará con postos gastronómicos e diferentes propostas para o público, nun espazo que o Concello está a preparar para recibir os visitantes durante as semanas de Nadal.

Nos últimos días avanzaron os preparativos das instalacións e os negocios participantes xa puideron coñecer os postos e trasladar as súas necesidades de equipamento. O espazo gastronómico contará con cinco postos nos que se alternarán trece establecementos ao longo da campaña.

Co acendido do 4 de decembro, a cidade dará así comezo a unha programación que se prolongará ata a chegada dos Reis Magos e que terá na praza de María Pita un dos seus principais focos de actividade.

0.11982989311218