A Coruña abre o prazo para solicitar as axudas de transporte en taxi para persoas con mobilidade reducida
O Concello da Coruña abriu hoxe, 18 de decembro, o prazo para solicitar as axudas destinadas ao transporte en taxi para persoas con discapacidade e graves problemas de mobilidade. Este programa, impulsado polo Goberno de Inés Rey, pretende facilitar os desprazamentos a través dun servizo alternativo e adaptado ás necesidades deste colectivo.
A concelleira de Benestar Social, Participación e Igualdade, Nereida Canosa, subliñou a relevancia desta iniciativa, que “axuda a centos de coruñesas e coruñeses que, polas súas dificultades, atopan barreiras ou mesmo impedimentos para empregar os transportes públicos colectivos”. Segundo indicou, o Concello prevé unha dotación de 125.000 euros para financiar esta prestación durante o ano 2025.
No último ano, o programa beneficiou a máis de 300 persoas, das cales moitas pertencen a franxas de idade avanzada, especialmente entre os 80 e 89 anos.
As persoas interesadas en optar ás axudas teñen un prazo dun mes para presentar as súas solicitudes, que poden formalizarse a través da sede electrónica do Concello, dispoñible na páxina web municipal. Máis información pode consultarse no Boletín Oficial da Provincia (BOP) e no portal web do Concello.