A cor de Betanzos toma o Museo das Mariñas coa mirada de Elena Otero Chas
O Museo das Mariñas incorpora este venres 5 de xuño unha nova proposta expositiva coa apertura de 'De color Betanzos: Pinturas de Elena Otero Chas', unha mostra que convida a redescubrir a cidade a través dunha ollada artística chea de luz, identidade e memoria visual.
A inauguración terá lugar ás 11.30 horas na sala de exposicións temporais do museo e contará coa presenza da autora, Elena Otero Chas, así como das comisarias da mostra, Claudia Quintela e Andrea Rio. Ambas son alumnas en prácticas do Mestrado en Estudos Avanzados de Museos, Arquivos e Bibliotecas da Universidade da Coruña.
A exposición reúne unha selección de obras nas que a artista interpreta distintos recunchos, paisaxes e elementos recoñecibles de Betanzos. A través da pintura, Otero Chas ofrece unha visión persoal da cidade, poñendo o foco na súa riqueza patrimonial e na forza visual dos espazos que forman parte da vida cotiá brigantina.
'De color Betanzos' propón así un percorrido no que a cor funciona como fío condutor para achegarse á cidade desde unha perspectiva contemporánea. A mostra busca non só amosar espazos coñecidos, senón tamén reivindicar o valor emocional e simbólico que teñen para a veciñanza.
A iniciativa está organizada polo Concello de Betanzos, coa colaboración da Xunta de Galicia e da Deputación da Coruña. Poderá visitarse no Museo das Mariñas ata o 31 de agosto, de luns a venres, en horario de 9.00 a 14.00 horas e de 16.00 a 20.00 horas.