A conta xeral desata un novo choque político polo obradoiro de emprego en Culleredo
A tramitación da conta xeral volve situarse no centro da batalla política en Culleredo. O PP denunciou que o Concello quedou fóra dun obradoiro dual de emprego solicitado xunto ao Concello da Coruña por non ter presentada en prazo a documentación contable de 2024, unha situación que, segundo os populares, supón perder preto de 400.000 euros para formación e contratación de persoas desempregadas.
A portavoz popular, Izaskun García, acusa o goberno de José Ramón Rioboo de provocar coa súa 'mala xestión' a perda de recursos e oportunidades para a veciñanza. O PP lembra que xa advertira esta semana de que Culleredo figuraba entre os poucos concellos galegos que non renderan a conta xeral dentro do prazo marcado. Unha información que tamén recolle o informe sobre entidades locais, no que Culleredo aparece entre os seis concellos que non remitiran a conta xeral de 2024 na data de peche do documento.
O argumento dos populares apóiase ademais nas bases da convocatoria autonómica dos obradoiros duais de emprego, que esixen ás entidades locais cumprir coa obriga de remitir as contas xerais ao Consello de Contas antes de que remate o prazo de solicitude. Estes programas están dirixidos a mellorar a empregabilidade de persoas desempregadas a través dunha combinación de formación e práctica profesional.
Desde o PP sosteñen que o caso é especialmente grave porque se trata dun programa pensado para dar formación, experiencia laboral e unha oportunidade de inserción a persoas en paro. 'Non falamos só de cartos, senón de veciños que podían formarse, traballar e mellorar o seu futuro', trasladan os populares, que acusan o goberno local de descontrol administrativo.
O Concello, pola súa banda, rexeita a lectura do PP e acusa a formación de actuar con 'desesperación electoralista'. O executivo local defende que xa está prevista unha segunda convocatoria de obradoiros de emprego e sostén que varios concellos, tamén gobernados polo PP, non podían acceder á primeira ao estar pendentes da aprobación da conta xeral.
Esa segunda convocatoria foi anunciada pola Xunta a finais de abril co obxectivo de ampliar a cobertura destes programas e permitir que entidades locais que non resultaron beneficiarias na primeira fase poidan concorrer de novo. A previsión autonómica é lanzar novos obradoiros de nove meses para persoas desempregadas.
Na relación de obradoiros concedidos para o período 2026-2027 publicada por Emprego Galicia aparecen proxectos de distintos concellos da provincia, pero non figura Culleredo. Si constan outras iniciativas próximas, como un obradoiro promovido por Betanzos con Coirós como concello asociado, ou proxectos en Oleiros, Ordes, Miño, Abegondo e outros municipios.
O goberno local tamén aproveitou a resposta para cargar contra a oposición, á que acusa de bloquear iniciativas municipais. O Concello sinala que continúa traballando en programas de formación e inserción laboral e cita, entre outras vías, contactos con Cáritas para ampliar as oportunidades da veciñanza.