A Condesa gañará novas zonas verdes con unha transformación que supera os 100.000 euros
A zona central da urbanización da Condesa, en Betanzos, será obxecto nos próximos meses dunha importante transformación coa execución dun proxecto de humanización e renaturalización que acaba de ser adxudicado polo Concello.
A actuación conta cun investimento de 102.521 euros e ten como principal finalidade modificar a configuración actual deste espazo urbano, no que o pavimento ten un importante protagonismo, para incorporar máis vexetación e crear áreas destinadas ao paseo, o descanso e a convivencia da veciñanza.
Os traballos desenvolveranse nas rúas Coral Polifónica e Bernardo Miño e incluirán a creación de seis grandes parterres de formas sinuosas. Estas estruturas estarán deseñadas como pequenas elevacións axardinadas que se integrarán nos percorridos peonís existentes.
As novas zonas verdes combinarán plantas de diferentes alturas, volumes e cores para crear unha contorna máis dinámica e que presente cambios ao longo das diferentes estacións do ano. A selección das especies terá en conta a orientación de cada espazo para favorecer o seu desenvolvemento e conseguir floracións durante boa parte do ano.
Entre as plantas previstas figuran gramíneas ornamentais, fentos, agapantos, rosas paisaxísticas, lantanas, bidueiros de cortiza branca, faias, cipreses e rododendros.
O proxecto tamén contempla a creación de novos puntos de descanso situados entre os parterres. Nestas áreas instalaranse bancos ergonómicos fabricados con materiais reciclados, coa intención de facilitar que a veciñanza poida utilizar estes espazos para descansar ou permanecer neles.
A intervención completarase coa colocación de pedra volcánica tipo picón nos parterres, un material que axuda a conservar a humidade do terreo, e coa instalación dun sistema de rega automatizado.
A alcaldesa de Betanzos, María Barral, sinalou que o proxecto permitirá renovar de maneira significativa a imaxe da urbanización da Condesa e avanzar cara a unha contorna con maior presenza de vexetación.
A actuación busca así transformar un espazo actualmente dominado polo pavimento nunha zona máis verde e agradable para o uso diario, combinando a mellora estética coa creación de novos lugares de estancia para a veciñanza.