A CIG logra a maioría no comité de servizos auxiliares do QuirónSalud de A Coruña
A CIG gañou as eleccións sindicais celebradas en IDCQ Servicios y Mantenimiento, empresa que xestiona os servizos de cociña, limpeza e mantemento do Hospital QuirónSalud da Coruña. A central nacionalista obtivo tres das cinco persoas delegadas que formarán parte do comité de empresa.
É a primeira vez que a CIG consegue representación nestes servizos auxiliares do hospital coruñés. O proceso contou cunha participación elevada, xa que votaron 39 persoas dun cadro total de 45 traballadores. A candidatura da CIG recibiu 22 apoios, fronte aos 16 votos obtidos por UGT.
Desde a central sindical valoran o resultado como un respaldo ao seu traballo no ámbito da sanidade privada e como unha resposta ao contexto laboral que, segundo denuncian, se vive no grupo sanitario. A CIG vincula estas eleccións coa situación de conflito sindical aberta nos últimos meses no Hospital QuirónSalud da Coruña.
O sindicato lembra que a comezos deste ano se produciu o despedimento do secretario do comité do hospital, así como sancións a este representante e á presidenta do órgano de representación. A CIG enmarca estas medidas na actividade sindical desenvolvida en defensa dos dereitos do persoal e dunha atención sanitaria de calidade.
A central agradeceu o apoio recibido pola súa candidatura e reafirmou o seu compromiso coa mellora das condicións laborais nas diferentes áreas do centro. Tamén avanzou que continuará traballando para combater a precariedade, a sobrecarga de traballo e calquera práctica que limite a acción sindical.