A ciencia volverá tomar as rúas de Cambre cunha nova edición da Open Science
A ciencia volverá saír das aulas para achegarse á cidadanía coa celebración da IX edición da Open Science Cambre, que terá lugar do 18 ao 20 de setembro no Parque da Igrexa. A feira reunirá máis de 150 mozos e mozas de entre 8 e 20 anos, procedentes de diferentes centros educativos e lugares, nunha proposta aberta e gratuíta.
A iniciativa, organizada pola asociación xuvenil XentD100cia xunto co Concello de Cambre, mantén a filosofía que converteu esta cita nun referente da divulgación científica xuvenil: que os propios estudantes sexan protagonistas e que o público poida achegarse á ciencia dun xeito práctico, participativo e entretido.
Baixo a idea de que está 'prohibido non tocar', a feira permitirá coñecer de preto diferentes proxectos científicos mediante experimentos, demostracións, xogos e actividades interactivas. A proposta está pensada tanto para familias como para estudantes e para calquera persoa interesada en descubrir a ciencia dun xeito diferente.
Tres días para experimentar
A Open Science abrirá as súas portas o venres 18 de setembro, de 17.30 a 23.00 horas. O sábado 19, a actividade desenvolverase de 12.00 a 19.00 horas, mentres que o domingo 20 a feira poderá visitarse de 10.00 a 14.00 horas. A entrada será gratuíta durante as tres xornadas.
A organización destaca tamén a participación de centros educativos, asociacións e outras entidades que achegarán os seus propios proxectos e propostas divulgativas. A filosofía da feira baséase en compartir coñecemento e facilitar que os máis novos non só presenten os seus traballos, senón que aprendan tamén a explicar e comunicar ciencia ao público.
Unha feira feita por e para a mocidade
A Open Science Cambre leva celebrándose desde 2018 e naceu como unha iniciativa vinculada ao movemento xuvenil e á divulgación científica. O proxecto conta cunha importante implicación dos mozos e mozas na propia organización, coordinación e desenvolvemento da feira.
Un dos elementos máis singulares da cita é tamén a colaboración das familias de acollida, que reciben nas súas casas parte do alumnado que se despraza desde outros puntos para participar no encontro. Esta fórmula permite crear vínculos entre os participantes e a veciñanza e facilita a chegada de estudantes doutras localidades.
A organización xa ten aberta a participación para diferentes perfís, desde centros educativos, asociacións e institucións ata familias de acollida e voluntariado.
Con esta nova edición, Cambre volverá converter durante tres días o seu centro urbano nun punto de encontro para a ciencia, a educación e a mocidade, cunha proposta que busca que aprender tamén sexa experimentar, preguntar e tocar.