A ciencia tamén se serve nos bares con catro charlas divulgativas en Arteixo
A ciencia sairá dos laboratorios e das aulas para instalarse nos bares de Arteixo. O municipio estrearase este ano como sede do festival Pint of Science, unha iniciativa internacional de divulgación científica que busca achegar o coñecemento á cidadanía nun formato próximo, distendido e aberto a todo o público.
A programación desenvolverase os días 19 e 20 de maio, ás 18.30 horas, en dous establecementos da localidade. O martes 19, o encontro terá lugar no Bar Latitud, situado na praza do Balneario. O mércores 20, a actividade trasladarase ao Bar La Ventana, na avenida dos Bosques. A entrada será de balde ata completar capacidade.
O obxectivo desta proposta é converter os bares en espazos de conversa nos que investigadores e profesionais da ciencia expliquen temas complexos cunha linguaxe sinxela e accesible. O público poderá escoitar charlas sobre educación, ríos urbanos, bioloxía molecular, química e o papel da tecnoloxía na investigación sanitaria, nun ambiente afastado dos formatos académicos tradicionais.
A primeira xornada abrirase coa charla 'Pensar coas mans', a cargo de María Cristina Naya Rivero, da Facultade de Ciencias da Educación da Universidade da Coruña. A continuación, Amal Nnechachi Bounous, de Cartolab, o Laboratorio de Enxeñería Cartográfica da Universidade da Coruña, abordará a importancia dos cursos fluviais nas cidades coa intervención 'Ríos urbanos: Monelos y otras historias fluviales'.
O mércores será a quenda de Elena Pazos Chantrero, do CICA, Centro Interdisciplinar de Química e Bioloxía da Universidade da Coruña, que falará sobre 'Péptidos: de la biología al diseño molecular'. A programación completarase con Martín Calvelo Souto, de Nostrum Biodiscovery S.L., coa charla 'Químicos sen bata ou como os ordenadores axudan a curar'.
A chegada de Pint of Science a Arteixo está coordinada por Manuel Regueiro, do ITG, e conta coa colaboración da área de Cultura de Arteixo e dos bares participantes. A iniciativa busca demostrar que a ciencia tamén pode contarse fóra dos espazos habituais, sen perder rigor, pero gañando proximidade co público.