A Casa Museo María Antonia Dans acolle ata finais de agosto a exposición 'El pulso que permanece' de Castrolara
A Casa Museo María Antonia Dans acolle desde este sábado a exposición de pintura 'El pulso que permanece', da artista Castrolara, que poderá visitarse ata o vindeiro 31 de agosto.
Á inauguración da mostra asistiu o alcalde de Curtis, Javier Caínzos, quen felicitou á autora polo seu “enorme talento” e animou á veciñanza a achegarse á Casa Museo para coñecer esta colección pictórica.
A exposición está composta por un total de 30 obras repartidas en cinco series: Orígenes, Silencios, Bocaditos de realidad, Reinas e Don't stop the music.
Entre as pezas expostas figuran retratos de personalidades como a pintora mexicana Frida Kahlo, a escritora Emma Goldman, a actriz Marilyn Monroe e referentes galegas como Rosalía de Castro. Ademais, a mostra inclúe varias obras da colección MyRoots de Ana López.
Segundo explica a propia Castrolara, 'El pulso que permanece' é un “percorrido íntimo a traves de series que nacen de distintos momentos, pero todas atravesadas por un mesmo fío invisible: aquilo que, no fondo, permanece”.