A Casa dos Xoguetes supera as 10.000 doazóns nun mes na Coruña
A Casa dos Xoguetes pechou a súa última edición na Coruña con cifras récord e consolidándose, segundo os seus organizadores, como ‘un proxecto esencial de solidariedade e de economía circular na cidade’. O espazo, situado no Espazo de Economía Circular da OMIC, abriu as portas o 1 de decembro e, desde entón, recibiu milleiros de persoas que acudiron tanto a doar como a recoller agasallos para os máis pequenos.
No balance final da campaña, contabilizáronse 10.112 xoguetes recollidos (incluídos disfraces e libros), superando antes de rematar o obxectivo máximo marcado. Do total, 8.837 xoguetes foron entregados no punto de recollida e distribución, mentres que 1.275 unidades quedaron reservadas para a súa doazón a entidades benéficas, prevista para completarse ao longo desta primeira quincena de xaneiro.
Máis alá da recollida e do reparto, a sede acolleu tamén o 3 de xaneiro unha xornada de obradoiros infantís gratuítos, con propostas lúdicas e divulgativas como un taller de xardinería sostible e unha sesión de contacontos. En total, participaron 117 nenos e nenas nas distintas actividades programadas.
A concelleira de Emprego, Comercio e Mercados, Diana Cabanas, destacou “o orgullo” de comprobar que a cidade “se preocupa e demostra, un ano máis, a súa solidariedade”, e subliñou que “ningún neno debería pasar as festas sen agasallos”.